3.5cm 鋁罐機械人

將汽水罐放入回收箱唔算叻，識得將鋁罐循環再用先叫勁！有人仲用摺紙方法嚟摺鋁罐，摺咗個超迷你立體機械人，仲賣到去日本同美國添！

喺會展嘅Design Gallery有好多本地設計師新產品，每次放工經過，我都會入去望吓，好彩對眼夠大，畀我望到櫉窗最近放咗一系列比手指尾仲要細嘅鋁罐機械人公仔「Canbot」，全身上下都係由鋁罐摺成，冇錯！係摺出嚟！呢個咁新穎嘅Idea嚟自設計師Orson，皆因佢一向鍾意摺紙，但係紙易變黃易爛，因而改為摺鋁罐。佢最初摺嘅都係單面機械人，經過幾年改良，配合日本摺紙手藝同微型力學計算，最終成功設計一個完全立體嘅機械人，而且百分百Handmade，仲要冇用螺絲、膠水，亦冇焊接，全部統一3.5cm高，比手指尾仲要細！Orson更將鋁罐機械人命名為「Canbot」，其實係將「Can」同「Robot」結合，Can除咗代表鋁罐外，亦想講「只要有恒心，乜嘢都有可能」，又環保又夠意思，好！

摺出彩虹

一直經營模特兒公司嘅Orson，當初摺鋁罐只係興趣：「最初朋友都唔知我做乜，冇乜人支持，後嚟將啲設計放上網，竟然吸引到美國設計師網站Notcot關注，之後又有日本朋友睇到，先正式開始响網上畀客人直接落Order，今年就正式返嚟香港囉！」每個機械人都係Orson一手一腳摺成，由最初冇人支持到依家遠銷到日本、美國，正好體現小小機械人「Canbot」背後嘅理念：「I can make it！」

網址：www.canbot.com

查詢：2575 7702