蜜運中嘅情侶最想Show畀人睇佢哋有幾咁恩愛，唔少人會選擇着情侶裝，但想玩得夠潮嘅話，咁就要去九龍灣嘅淘大商場，皆因當中有工藝教室提供情侶勾織課程，DIY禮物送畀Honey之外，仲可以選購情侶Twins相機同揀番款情侶手錶做信物，真係恩愛到痹！

編織愛心教室

送件溫暖牌畀另一半最Sweet又有意義，唔想織頸巾咁老套，又想親手為對方製造驚喜？就可以到商場三樓「飛常教室」報讀「日式毛冷公仔勾織班」，親手勾番個毛冷公仔送畀Honey。老闆娘Grace表示：「其實嚟學勾毛冷公仔嘅唔一定係女生，有唔少男生都想親手勾番個公仔送畀女友，別具心思又獨一無二，甚至有男生勾了個毛冷公仔嚟求婚添！」另有「日式時款毛冷編織班」，教授編織日本最新款式毛衣、圍巾、冷帽及勾織技術。Grace表示，織一件今年最新款嘅毛冷頭笠，一個初學者最多只需要三個星期時間便完成，依家開始學就啱啱可以趕得切天氣轉冷前送畀Honey，度過暖笠笠嘅秋冬啦！

公仔勾織班有唔同系列選擇，其中制服系列最受男女歡迎。（a）	勾織出嚟嘅毛冷鮮花，別具心思同心意。（a）	着住對暖笠笠嘅毛拖鞋，感覺特別Sweet！（a）

日式毛冷公仔勾織班

作品款式自選，全個課程教授作品數量最多3款。

學費：$380/6堂

（每堂個半小時，材料另購）

日式時款毛冷編織班

毛衣、冷帽、頸巾等作品款式自選，教授數量不限，視乎進度，最少可完成2至3款。

學費：$380/6堂

（每堂個半小時，材料另購）

DIY相機影蜜照

如果可以為女友親手DIY部相機，然後影番輯靚相嘅話，係咪好有心思呢？裝嵌相機有難度？未必！位於三樓嘅「宇宙電子有限公司」就有DIY相機售賣，只要跟住說明書裝嵌，就算從未砌過模型嘅男女，都可以輕易砌部靚靚相機出嚟。另外，店內仲有專為情侶而設嘅Twins相機「Holga Micro-110」，的骰小巧嘅外形唔止Colorful，紅白藍黃綠乜嘢顏色都有，又可以隨時隨地拎出嚟，幫對方留住Sweet嘅一刻。店主王先生表示：「近年興玩3D立體攝影，但係坊間嘅雙鏡頭3D立體相機起碼賣四千蚊，並非人人負擔得起。不過我哋就有部雙鏡頭3D立體相機『Hogla 135 TIM』，同樣可以影到靚爆3D立體相，外形夠Cute，而機身顏色仲有多款選擇，售價四百蚊有找，相當抵玩！」

的骰小巧Holga Micro-110相機，攜帶方便，備有多種顏色供選擇。$30（b）	DIY相機Holga 135 Camera Model Kit ，親自裝嵌，零舍有Heart。$40（b）	Hogla 135 TIM可以影出超靚立體相，價錢仲相當抵玩！$390（b）
Hogla 120m Twins相機最啱情侶使用，一人一部，一雙一對。$48/對（b）

潮爆情侶手錶

唔想着情侶裝咁張揚，情侶手錶係個唔錯嘅選擇。位於二樓嘅「Silver Rock」就係潮流拖友嘅必到之處！店員Apple表示：「店內唔少錶款都係獨家發售，加上錶款走中性路線，男女都咁啱戴。」即使係男士眼中女性味甚濃嘅Bling Bling款式手錶，都有唔少男士專程嚟買番對送畀女友，好襯成一對！另外，店內仲有Kidult至愛嘅Lego × 星戰系列手錶，將Lego同星戰元素合二為一，更隨錶附送星戰Lego玩具一個，女生冧男友同樣有計！

同女友拍拖買情侶手錶做定情信物，仲唔錫晒你？	這款Bling Bling Mosaics Series錶面以英國國旗為題，並鑲上37粒閃石，令人心動。推廣價$698/隻（c）	Triangle Series以埃及金字塔為設計概念，外形相當別致。推廣價$598/隻（c）
Lego ×星戰系列手錶取材自各星戰人物，玩味十足，星戰迷必備。$215起/隻（c）

查詢：（a）2759 9162

（b）2750 2116

（c）2753 5876