臨近年尾又多番啲新Game推出市場，講到今個禮拜最搶手就梗係呢隻《Dead Rising 2》。主角為咗救愛女，要喺72小時內，於賭城一面狂劈喪屍，一面諗計逃走。相比起4年前嘅第一集，新作可隨手拎起雜物攻擊喪屍外，亦可將唔同物件組裝成更強嘅武器劏屍或炸爆屍群，玩法更血腥更暴力！

上集《Dead Rising》只係出咗Xbox 360同Wii版，就已經賣咗超過150萬套，到《Dead Rising 2》時就再出埋PS3版，斷估會有更多玩家大開殺戒。今集仲對應雙人協力，可以隨時Call埋朋友一齊對付屍群，爽！

各位亦可揸住架越野電單車穿梭賭城，順便撞低喪屍。

呢個叫《Stand Up Zombie》嘅節目，要玩家好似扑傻瓜咁扑死啲喪屍。

自製「攞你命三千」

《Dead Rising》好玩之處係可以隨手執起任何物件攻擊喪屍，隨住能力提升，甚至乎可以將成張長櫈車落喪屍度。今集除保留咗呢個咁正嘅設計外，仲加埋組裝新玩法，可以自行砌出「攞你命三千」嘅劏屍武器。譬如將兩個電鋸安裝在獨木舟船槳兩邊，同時左右開弓鋸開喪屍，非常殘忍！

遊戲入面要不時飲飲食食補充體力，但狂飲啤酒都會嘔，幾真實。	今集男主角要打喪屍賺錢買解藥，等愛女唔使屍變。	將兩個電鋸縛在船槳兩端，就可以左右開弓狂鋸喪屍，相當變態！

呢個名為「Combo Weapons」嘅武器組裝系統，仲可以畀大家發揮無窮創意，開發出最具攻擊力嘅武器，例如將火把縛在球拍上兜頭拍打喪屍；亦可以就地取材自製大聲公，用音波震爆喪屍；甚至將機關槍安裝在輪椅上，變身成衝鋒車橫掃全場，不過話晒成個賭城咁大，要走勻全場都唔容易，所以主角可以騎住架越野電單車四處去，順勢撞死多幾件喪屍。

為救愛女 限時滅屍

故事設定在第一集之後幾年，上集主角記者Frank成功從被喪屍入侵嘅Shopping Mall甩身，但原來喪屍事件已蔓延到全美國，呢集就輪到本來係越野單車冠軍嘅Chunk唔好彩，佢為咗要賺錢買藥救番被喪屍病毒感染嘅愛女，明知有機會變成喪屍嘅點心，都要去賭城Fortune City參與鬼佬版「筋肉擂台」─「Terror is Reality」遊戲，喺唔同項目上用盡各種方法斬殺喪屍，仲要喺72小時內帶埋囡囡逃出生天，諗落都幾慘！

二人合作 一人做餌

此外，《Dead Rising 2》亦引入唔少有趣新系統，例如主角男人老狗走到女裝部換上Tube Top、短裙，睇見都唔開胃，嚟緊仲有如羔羊醫生嘅面罩等衣飾，會以DLC形式畀玩家Download。今集亦引入二人Co-Op系統，例如由其一人做餌吸引大批喪屍聚集，然後隊友就可以用機關槍掃射或引爆滅火筒一次過消滅大量喪屍，順帶一提香港行版係最血腥同暴力嘅版本，大家要有心理準備，見到大量血流成河嘅畫面！

遊戲檔案

類　　型：動作

開　　發：Capcom

平　　台：Xbox 360、PS3

推出日期：剛推出

售　　價：$298

查　　詢：2725 3338