《Kane & Lynch 2：Dog Days》上海以不擇手段犯罪為主題嘅《Kane & Lynch》，3年前推出第一集時坊間評語有讚有彈，但機迷都幾受落冷血僱傭兵Kane及精神病患者Lynch呢對配搭，到即將在月底推出的第二集《Kane & Lynch 2：Dog Days》就容許玩家中槍倒地後駁火還擊或搵掩護匿埋，更新增玩法特別的Arcade Mode，搶完錢逃走時，仲要小心畀其他同行做低食夾棍。

由於今集遊戲舞台搬到去上海，遊戲內的街道景物都幾熟口熟面，仲可以見到周街中文路牌，連遊戲Logo都加入「伏天」這名稱，大賣中國風。

槍戰私刑超暴力

今集故事延續自第一集，但主角就由上集嘅Kane轉到Lynch身上，講Lynch同女友諗住到上海過啲平淡生活，點知有一日無意中捲入一宗軍火交易案，迫於無奈之下要搵Kane出山解圍。至於遊戲內容離不開槍戰、搶錢、行私刑等非法勾當，場面有齊暴力、血腥、暴露，絕對兒童不宜；不過遇到爆頭或者露點等過激場面，遊戲都會自動打格仔，事實上又冇太多嘢睇！

人肉盾牌擋子彈

上集為人詬病嘅靠牆掩護系統，到《Dog Days》就換上簡單的設計，只需個掣即可進入或脫離掩護系統，不過大家要留意今集遊戲內的掩護物，好似屋內的友柱、飯枱或屏風等都可以打爛，所以唔可以匿埋响同一掩護物後太耐。雖然遊戲仍然採用自動補血系統，不過中槍後有機會被打至倒地，今集就可以畀大家選擇在地下開火還擊，抑或即刻爬開搵掩護物等待補血。嗜血嘅玩家更可以試埋新增嘅人肉盾牌系統，從後箍住途人擋子彈，都幾變態。

多重鏡頭富電影感

《Dog Days》另一抵讚嘅新設計係加入唔同角度嘅視點，唔似上集採用固定視點咁單調。為求增加遊戲真實感，今集加入唔少手持攝影機嘅拍攝手法，有時會跟住角色嘅動作變成搖鏡，有時鏡頭又會拉遠到睇晒成個大環境，遇到驚險場面時仲會變成慢鏡，加入埋Noise等後期處理，拍攝手法好有電影感，似足置身現場犯案一樣。

電腦刧匪變真玩家

遊戲內的犯案方式主要都係開槍、打劫同逃走，但今集新增的Arcade Mode單人玩法都幾特別，玩家可以跟由電腦控制的劫匪帶住贓款走佬，要搭車避開警察追捕，目標係要帶住最多錢離開。如果有良心，就可以搵其他劫匪協助走難再上車分錢，亦可以殺死同黨搶埋佢嗰份，實行黑吃黑。

這個瘋狂嘅Arcade Mode單人模式換到連線模式後，就變成Fragile Alliance，而電腦操控的劫匪就變晒真實玩家，到底隊友會唔會唔等埋你或轉個頭做低你搶埋你嗰份，真係要玩過先知。此外，遊戲還提供「Cops & Robbers」兵捉賊同「Undercover Cop」搵臥底兩種連線玩法，雖然冇Fragile Alliance咁過癮，但都有一定可玩性。

遊戲檔案

類型：射擊

開發：Eidos

平台：Xbox 360、PC

推出日期：8月27日

售價：$299（Xbox 360）、$280（PC）

查詢：2418 8896