Apple iPad雖然好吸引，但三、四千蚊起跳的售價，仍然令部分用家要再諗諗。出開手機、PMP機的本地品牌ASK，推出了一款貌似iPad的MID—711SP Smart Pad，機身冇iPad咁大，但同樣可以篤芒、上網、下載應用程式（Apps），而且千幾蚊有交易，平過iPad一半以上，就等小記為大家測試一下佢有幾抵玩。

買家心態，梗係想部機又平又多功能，但又擔心平價機易壞。ASK是香港本地品牌，而且711SP Smart Pad仲提供了一年保養，解決了用家的後顧之憂。

720p超順 播放720p或以下影片非常流暢，色彩、細緻度均表現不俗。	設有mini-USB、色差輸出、HDMI、USB等介面，擴充性勁過iPad。	機側設有開關鍵、返回鍵及音量控制鍵。

7吋篤芒 Wi-Fi上網

Smart Pad內置7吋輕觸式屏幕，主要操作都係靠篤芒進行，由於屏幕使用電阻式觸控技術，用指甲篤芒比手指頭較易感應得到，啱晒留有指甲嘅女性用家。另一賣點是支援Wi-Fi無線上網，上Google、開網頁、查電郵，統統可以做得到，而預設的虛擬鍵盤，提供了英文和Google拼音輸入法，如果想用倉頡或速成，就要上Android Market下載如《HKIME》等應用程式協助。另一有趣之處是內置了Motion Sensor，會自動感應機身方向而轉為橫向或直向顯示，雖然要大動作才能感應得到，但在千多元的MID上有此功能，算是個驚喜。

放大圖片	運行Android 1.5作業系統，可以玩到不同類型的Apps。	內置2GB儲存，可加插microSD卡擴充容量。

輕過iPad 介面齊全

部分玩過iPad的朋友指出雖然部機夠薄，但長時間拎住都幾攰。Smart Pad相對就輕巧得多，機身重量只有380g，同一罐汽水差唔多重，玩成日都唔怕手軟。此機的機面似iPad，圓潤的機背更像iPhone 3GS，連屏幕下方都有一粒圓形的Menu鍵，但真正的開機鍵設在機側，仲要緊按3秒才能啟動。此機只內置2GB儲存，但就配備了microSD插槽，最高支援32GB容量；同時，機側更設有mini-USB、色差輸出、HDMI及USB等介面，駁電視、電腦甚至外置硬碟等器材都極之方便。

支援多種影音格式，毋須轉片就可以像PMP一樣直接播放。	46秒開機 開機時間僅46秒，只係慢過Android手機少少。	激輕380g 機身只有380g，重量跟一罐汽水差不多，長時間拎住都唔怕攰。

玩Apps睇片 唔使轉

iPad矜貴在可以透過App Stove下載應用程式，Smart Pad都唔輸蝕，預載Android作業系統，可以上Android Market下載遊戲、電子書、PDF閱讀器、Skype等多種實用又好玩的應用程式，不過有兩點要注意，首先是此機運行的是舊版Android 1.5，未必支援到新版本的Apps；其次是Android主要是為手機而設，解像度跟Smart Pad有出入，顯示時或會出現變形。至於睇片方面，Smart Pad毋須轉片已可直接播放RMVB、MOV、DAT、FLV、MPEG4等多種格式，兼且可以玩理iPad或iPhone不支援的Flash，睇網頁或玩Flash遊戲都方便得多。

Apps任玩 可以直接上網下載Apps，遊戲、實用工具都搵得到。

反應尚可 採用電阻式屏幕，反應不及iPad，但打字速度尚可接受。

機檔案

容　　量：2GB Flash

記　憶　體：128MB

顯　示　屏：7吋電阻式輕觸屏幕

作業系統：Android OS 1.5

其　　他：Wi-Fi

使用時間：4-5小時

體　　積：203×120×14mm

重　　量：380g

查　　詢：2389 5888