今年夏天真係勁熱，聽日係大暑，一於煲番啖靚湯畀老公同囝囝飲，順便教大家消暑大法啦！
大暑係中國二十四節氣其中之一，表示呢日太陽會處於黃經一百二十度，同時亦為一年最熱嘅一日。其實咁熱都真係無乜心情煮飯，好彩我有兩個好朋友：漢方妍肌堂中醫藥中心註冊中醫師彭明慧（Elisa）、美國註冊營養師何智衡（Douglas），佢哋醒我好多健康貼士，講到消暑，最好梗係要食冬瓜同西瓜啦！
Elisa話冬瓜屬寒性，最啱夏天心煩氣躁、悶熱鬱滯時食，而且更有利尿、消腫去脂、生津止渴之效，解暑一流！至於西瓜亦同樣屬寒性，具清熱解暑、生津止渴、利尿除煩及降壓之效；Elisa仲話西瓜含好多水分，所以食咗後排尿量會增加，連鹽分都會排出體外，有效減輕水腫，尤其對減退腿部浮腫特別有效，所以西瓜堪稱為天然美腿水果。
聽完中醫師見解，不妨聽埋營養師Douglas意見，佢話冬瓜同西瓜確實有好高營養價值。Douglas話每100克冬瓜，已含一定分量嘅蛋白質、碳類、鈣、磷、鐵及多種維他命，特別含較高維他命C，而且最筍嘅係冬瓜含丙醇二酸，對防止人體發胖、增進形體健美勁有幫助。至於西瓜含脂肪量微少，汁液中幾乎包含所有人體所需嘅養分，多汁又解渴，實為夏日消暑佳品。不過Douglas提醒我，指腎病患者不宜多食西瓜，就算飲西瓜汁都要注意分量，因為西瓜糖分較高，糖尿病患者亦應適可而止。
中醫推介：消暑冬瓜陳腎蓮蓬湯
材料：
冬瓜3斤、陳腎4個、蓮蓬3個、荷葉半張、扁豆1両、生熟薏米各5錢、瘦肉10両、果皮1片
做法：
1. 先將冬瓜洗淨，切塊備用；陳腎、瘦肉洗淨，備用。
2. 果皮浸軟，刮囊，備用。
3. 蓮蓬、荷葉、扁豆、生熟薏米洗淨放入湯煲內，加入約4公升水中浸約15分鐘。
4. 上述材料煲滾後，加入冬瓜、陳腎、瘦肉及果皮，水滾後轉中小火熬約2小時，加鹽調味即成。
營養師推介：涼拌西瓜皮
材料：
西瓜皮1/4個、紅椒1/2個、大蒜3至4瓣、鹽適量、鮮露少許、沙糖少許、香油少許
做法：
1. 留一些吃剩嘅西瓜皮，剔走紅色果肉，再切去瓜皮，只留淺綠色部分並切成薄片。
2. 將薄瓜皮放入大碗加鹽拌勻，待醃至軟身，備用。切大蒜末和紅椒絲，備用。
3. 薄瓜皮醃好後，用凍水沖洗一下，再擠去水分。
4. 最後加入蒜末、紅椒絲、鹽、鮮露、沙糖及香油拌勻，喜歡可以再加一點果醋，拌勻後即成，又或放進雪櫃冷藏一下才吃。
叻太消暑Tips
1. 大熱天時陽光特別猛烈，為免眼睛受損，記得帶番副「超」呀！
2. 平日防曬一定要做足，以免被紫外線曬傷。
3. 出街前幫囝囝戴番頂帽，都係阻擋紫外光嘅有效方法。
4. 夏天出得汗多，記得時常補充水分，等到口乾先飲水就遲啦！
5. 進入冷氣地方前，最好將汗水抹乾，可減低着涼機會。
叻生：防水高清數碼攝錄機
夏天去沙灘玩，最怕整濕啲相機、攝錄機，不過，近日見到Oregon Scientific推出Action Camera ATC9K防水高清數碼攝錄機，咁就唔怕整濕啦！呢部機配備多款唔同免提裝置配件，就算得我囝囝兩個去玩，都可以影合照，加上攝錄機配備遙控器，操作自然更加得心應手，而且影像更以1,080P高清拍攝，最高可以支援32GB記憶卡，咁拍幾多段片都冇問題啦！
查詢：2303 1889
叻太：又一本扮靚天書
問10個女人，9個都鍾意扮靚，近排書展開鑼，好多新書出街，咁就畀我發現一本《搞鬼扮靚日誌》，作者小欣化身「扮靚教主」，以輕鬆惹笑嘅手法及柔和畫風，講解最自然、最容易及最有質素嘅美容護膚心得，而且書入面仲顧及健康、價錢，以最簡單易用嘅方法，同一眾女生分享扮靚樂趣。真係睇到我津津有味，仲學咗好多美容小秘訣，問吓老公我有冇靚咗先！呵呵！
查詢：2865 4848