夏日炎炎，好多人都會走去沙灘游水，可惜iPhone冇防水功能，唔可以陪住用家落水玩，但App Store就有不少跟「水」有關嘅程式，安裝後不但可改善游泳及潛拍技巧，還可增加對海洋生物的認識，即睇！

泳式隨身學《Go Swim》

就算影相幾叻都好，若泳術欠佳亦會事倍功半，此程式會透過錄像形式，傳授背、蛙、蝶、自由4式的正確撥手及踢腿方法，唔明仲可透過「Fan Wall」跟世界各地泳手交流意見及心得，學咗後話唔埋下個菲比斯就係你！

潛拍模擬器《Underwater Photo Simulator》

若然潛水時以平日用開的拍攝設定影相，經常會出現很大落差，唔想每次都要臨場「執生」調校，就唔好錯過呢個App。程式會模擬水底拍攝環境，讓用戶練習不同光圈、快門及閃燈強度在水底下使用的效果，記熟設定再落水，潛拍自然得心應手！

深海魚百科《Fish Watching Guide》

輯錄了大量日本著名水底攝影師中村廣治（Koji Nakamura）的作品，不但提供235種魚類的相片，還附設品種、體積、出沒地點及英文/拉丁文名稱等資料，猶如一本深海魚的百科全書，就算唔識影相，單睇相片已令人有落水的衝動！