各位球迷由聽晚開始都應該冇覺好瞓，為的當然係通宵捱眼瞓睇好波！除咗一晚睇三場世界波呢個指定動作外，一於喺中場休息時打多幾鋪足球Game，實行連汁都撈埋。新出嘅足球遊戲《Pure Football》，唔玩正常嘅11人對賽，而係搵嚟成班世界級球星一齊踢5人賽，在多個好有特色嘅迷你球場出盡茅招踢波，而且絕對唔會有「黑哨」問題，因為遊戲內根本就冇球證！
正常嘅足球遊戲，要經常睇住有冇隊友越位，又怕犯規被罰黃牌或被紅牌趕出場，下下就住就住，玩得多有時都幾煩人，所以改玩《Pure Football》這種冇規則嘅足球遊戲，感覺真係過癮好多。
人撞人落力飛剷
遊戲一大賣點係冇球證兼冇球例，膊頭撞膊頭，撞完人先攞波，甚至連人帶腳剷波都係基本動作，總之搶到個波再射入就係好球。為咗減低這種私鬥式足球嘅暴力程度，遊戲開發小組就加入唯一犯規動作，無論球場內任何一方，只要蓄意踢中對方隻腳而又掂唔到個波，都會即時被罰「12碼」，不過筆者試玩過後，發現就算輸「12碼」都好，電腦嘅入波能力都唔係太高，各位可以放心盡情飛剷。
碧咸出場私鬥
雖然遊戲設計都幾瘋狂，但當中嘅物理反應同肢體動作都做得相當逼真，只係整體感覺比較漫畫化，入波後的慶祝動作會突然變成美式漫畫，而且在賽事中遇到好激烈的場面時，更會自動進入慢鏡模式。咁到底可以「吸引」到幾多球星參加比賽？原來都有成17支國家隊同230位真實球星參賽，包括遊戲封面的謝拉特，甚至連因傷冇得在世界盃出場嘅碧咸都有份。每隊都有成十幾位球星，只能揀5個出賽都唔係咁容易選擇，好在《Pure Football》內已預定咗「攻擊型」、「平衡型」同「防守型」陣容，唔使花時間揀人就可即時開波。遊戲支援連線對打外，亦能做到單機四打，世界盃中場休場時即刻有得玩，正！
足球新Game有排玩
除咗《Pure Football》外，近幾個星期都有唔少足球遊戲推出，想玩正統足球遊戲落場踢，或者指令式甚至係育成經營模式都有，總之球迷今期定可玩餐飽。
《2010 FIFA World Cup》
今年世界盃官方遊戲《2010 FIFA World Cup》，最大賣點係真實，由落齊199支國家/地區球隊，到球場、球員、波衫同波Boot，都係用上真實資料，而且在決賽周比賽時會見到滿地彩紙碎，好有嘉年華氣氛。筆者就試過用日本隊喺決賽大炒荷蘭捧盃，勁有滿足感。
開發： EA Sports
平台： Xbox 360、PS3
售價： $329（Xbox 360）
$380（PS3）
《Wining Eleven 2010蒼侍之挑戰》
「蒼侍之挑戰」即是「藍戰士之挑戰」，藍戰士就係指日本國家隊，新版本其實係去年底推出的《Winning Eleven 2010》嘅加強版，除球員、球會資料更Update外，亦加入「Japan Challenge」模式，可在遊戲之中帶領日本爭奪世界冠軍。
開發： Konami
平台： PS3
售價： 約$520
《足球小將 激鬥之軌迹》
今年係《足球小將》漫畫誕生30周年，廠方都出番隻新作賀一賀。《激鬥之軌迹》玩法同多年前紅白機時代相同，都係靠入指令踢波，刺激度雖然爭咗少少，但勝在故事內容由戴志偉升上南葛高中，打到去國際少年足球賽，加上日語配音，啱晒漫畫迷可以懷緬一番。
開發： Konami
平台： NDS
售價： 約$350
《超熱血足球聯盟Plus》
乘勢復古推出的還有另一套紅白機時代極受歡迎嘅《超熱血足球》系列，Remake作《超熱血足球聯盟Plus》玩法冇大改動，目標係帶領日本隊跟世界列強周旋。遊戲好玩在角色造型爆笑，兼各有必殺技，亦支援連線對戰及協力玩法。
開發： Arc System Works
平台： NDS
售價： 約$280
《創造球會DS World Challenge》
《創造球會》玩球員育成兼經營球隊，在半場或者兩場球賽之間過手癮就最啱。剛推出的新版本《創造球會DS World Challenge》就首次可以挑戰世界，只要贏得J League後仲可移師英格蘭、西班牙或意大利聯賽，幾有挑戰性。
開發： Sega
平台： NDS
售價： 約$350
《X2 Football 2010》
要喺iPhone咁細嘅畫面上以Multi-Touch方法玩足球遊戲確實相當困難，但新推出嘅《X2 Football 2010》算係iPhone足球遊戲佼佼者，無論係畫面以至可玩性都甚有水準，而且遊戲內收錄了10個國家共150支真實球隊，製作都算認真。
開發： Exient
平台： iPhone
售價： 4.99美元