玩厭咗純粹賣真實同速度感嘅賽車遊戲，可以諗吓呢款以暴力掛帥嘅《BLUR》。它是由開發《Project Gotham Racing》嘅Bizarre Creations負責，今次唔單只有靚車靚景，而且可以隨街執起武器攻擊對手，玩開《孖寶賽車》嘅玩家應該唔會感到陌生，但論暴力程度當然係《BLUR》勁得多！

跟講求駕駛技巧嘅《PGR4》好唔同，《BLUR》除了要鬥快衝線外，比賽過程仲要不停搵武器攻擊對手，玩家最多可以揸住3件不同武器，因應唔同嘅環境轉換，感覺就好似喺射擊遊戲內換槍打敵人，總之玩得夠High夠刺激。

八款武器任執

遊戲入面設有8種武器畀玩家選擇，當中有唔少「損人利己」嘅設計，部分武器更可向前或向後發射來產生唔同效果。輔助類武器就有「Repair」、「Shield」同「Nitro」，「Repair」就係將戰車即時回復到完好狀態；當發動「Shield」後就可在短時間內抵擋所有攻擊；「Nitro」則可在瞬間增加爆發力，方便在車群中突圍，但同時亦可以向前發動，產生強大嘅空氣阻力幫助減速，掟急彎時就好有用。

衝擊波震走對手

攻擊類武器則以「Shunt」同「Barge」兩種嘅殺傷力最大，「Shunt」可以畀玩家發射出具有追蹤能力嘅大火球，雖然速度唔快，但攻擊力強，同時亦可向後發射，不過就冇咗追蹤能力。如果身邊有其他對手嘅話，用衝擊波「Barge」就可震走晒其他對手，以及阻止攻擊，由於每次可儲存3件武器，唔會話用晒手上嘅武器先可以再執新武器。

真實名車賽道

《BLUR》玩法雖然都幾瘋狂，不過遊戲中出現嘅戰車同賽道都係真有其「車」。今次遊戲就提供了大量世界級車廠嘅真實名車，當中包括BMW、Chevrolet、Ford、Land Rover、Aston Martin，Renault、Toyota等等，合計有成70幾款。賽道方面就提供了14條世界著名街頭賽道，當中包括洛杉磯、紐約、巴塞隆拿、三藩市及東京等地，一邊飆車攻擊其他對手，一邊欣賞唔同城市嘅著名地標。另外單機時，《BLUR》可讓4名玩家以分割畫面同場進行比試，亦支援到20人網上連線對戰，仲可以玩埋《PGR》系列獨有嘅「Bulldog」同「Cat and Mouse」模式，都算唔話得。

遊戲檔案

類型： 賽車

開發： Bizarre Creations / Activision

平台： Xbox 360

日期： 已推出

售價： $399

查詢：2418 8896