依照日本四月份統計數字顯示，Sharp AQUOS電視銷量佔當地市場三成七，穩佔第一位。趁住今年係AQUOS面世十周年，Sharp邀請傳媒參觀剛投產的世界初用上第十代玻璃基板的「Green Front Sakai」堺工場外，仲預先展示市場上首部用上四原色LCD Panel的Quattron系列LCD電視LE810，畫面睇黃色同綠色比以前更靚更Sharp，連日本方面都係今日先搞發布會咋！

何解Sharp會選擇在新落成的堺工場展示Quattron系列電視LE810呢？最大原因是該廠是目前最先進的工場，製作新一代X-Gen屏幕，而且四原色LCD屏幕亦會由這個新工場生產。

底座邊緣以及邊框上都用半透明設計，非常有型。	Quattron系列Panel在三原色外加上黃色，會由堺工場負責生產。	機身都算造得幾薄，亦提供四組HDMI端子。

黃綠雙色更Sharp

第一眼望見LE810，已覺得其黃色同綠色部分特別鮮艷，充分顯示色彩層次，尤其將LE810與之前的G7相比，更易發現兩者的分別。Sharp的Quattron系列所用的四原色技術，係在原有紅、綠、藍濾鏡上加入黃色，更有效加強中色域的色彩層次，如黃色、綠色等常於大自然景物出現的色彩，就比之前顯示得更色澤分明，解決以往電視較難顯示的黃同金色，絕對係電視界的一項突破。

靚色對比 用上原來三原色Panel，色澤明顯較暗啞。	靚色對比 四色Panel顯示下，明顯黃花的色彩更鮮艷，亦能看出當中的色彩層次。	選項介面跟新推出的LX1相同，簡單易用。

今年抵港機會大

LE810四角採用圓滑金屬圍邊，機身厚度亦只得39mm，邊框用上半透明設計加上輕觸式功能按鈕，底座的設計亦跟邊框一脈相承。這部46吋型號亦用上最新的X-Gen屏幕，加埋Edge LED背光技術，以及100Hz升頻功能，雖然外觀未有太大突破，但顯示效果足可彌補。日本方面要等到今日先會正式發布，香港Sharp亦表示今年內應會引入Quattrons系列電視。不過有點失望係今次未能見到Sharp 3D電視的真身，據講今日日本都會公布關於3D電視的資料，希望香港方面今次能夠追得貼啲啦！

綠色新工場

「Green Front Sakai」堺工場位於大阪府堺市堺區，距大阪市中心只約40分鐘車程，強調綠色及環保。廠房由2007年12月開始興建，到09年10月完工，今年初正式投產，主要生產第十代玻璃基板及UV2A技術LCD Panel，尺寸為40吋以上，預期到今年七月將會增產到每月72,000塊玻璃基板，同時亦設有太陽能電池生產廠房。「Green Front Sakai」總面積達127萬平方米，約等同四個龜山廠房咁大，都幾誇張。

「Green Front Sakai」企畫推進中心參事石原博充先生，展示目前最先進的第十代玻璃基板，可分割出八塊60吋玻璃基板，適合大尺寸電視使用。	工場區內的LED街燈由太陽能發電，認真環保。	堺工場內設有LCD工場和太陽能電池工場外，區內的環保設施都做得相當周到。

AQUOS光輝十年

第一部AQUOS幾時推出市場？答案係2001年1月。今次Sharp安排一眾傳媒到位於奈良縣天理市的Sharp歷史技術Hall，見證AQUOS發展史之外，仲由Sharp最早期的自動鉛筆到現時的LCD及LED燈技術都有得睇，兜一個圈，就睇勻Sharp逾百年歷史，只係爭在未有Sharp剛剛在日本公布的3D電視及手機用3D Display睇囉！

2007年，Sharp推出當時全球最大的108吋AQUOS TV，今日睇仍覺大得誇張。	在歷史技術Hall門外，擺放香港都是剛推出市的60吋新型號LED背光電視LX1。	前方的LC-20係首款推出的AQUOS TV，對比後方於1960年生產的首部20吋彩電CV-2101，科技果然一日千里。
Sharp歷史技術Hall雖然有點隔涉，如果有心睇的話，只要提早預約，都可以入去參觀兼有專人講解。