雖然已經唔係十八廿二，但我一樣享有晒美腿嘅權利！之前見到好多美腿產品上架，有好嘢梗要同你哋一班姊妹分享啦！

所謂美腿當然係線條要靚，仲要夠Firm夠Slim，依家有好多小法寶幫手，好似按摩襪、壓力襪，具有按摩同紓緩疲勞功效外，仲可幫助收緊腿部線條，避免水腫或甲組腳，有啲仲可以減埋卡路里，都咪話唔神奇！姊妹們仲要記得趕走礙眼嘅死皮，日本新出一款電動脫死皮器，相當方便！最後唔好忘記補濕，沖完涼或去完死皮、做完磨沙記得搽Lotion呀，咁就萬無一失啦！

壓力與按摩襪 唔願做運動，但又想要對美腿？着住呢對壓力與按摩襪行一個鐘，據講可減399至407卡路里，勁呀！（左）$80（右）$88	電動脫皮器 可以隨意換機頭，一部機已經搞掂清潔、磨皮、去角質層、搽Cream護腳4步驟。$178	生薑按摩膏 含生薑、金銀花、柚子等7種漢方草本成分，其中生薑具行氣活血功效，血液循環好啲，對腳都靚啲！$145
瘦腿墊$268	高級天然浮石（腳踭用）$52

穴位按走甲組腳

香港中文大學中醫學院臨床導師林冠傑解釋：「中醫角度認為水腫與肺、脾、胃三臟有關，主因係水液代謝出問題，而水與氣互動，氣虛都會引致水腫，呢個時候就要補氣，而現代醫學指心臟問題、靜脈曲張都會出現水腫，所以去水腫絕對係對身體好。」叻太當然唔放過林醫師，叫佢介紹幾個穴位按摩，每次用指尖或指腹輕按10秒，重複15至20下就得啦！

裂缺 有效針對面腫同腳腫，正確位置就喺腕橫紋對落一吋半。 註：中醫所指一吋，即以個人拇指第一節長度計算。	陰陵泉 位於脛骨內側，踝下緣凹陷位，能紓緩水腫、膝痛等作用。	水分 於肚臍正中對上吋半位置，主要調節脾胃，按一按不但有效收水腫，仲可以減肥，改善長期消化不良添！

草藥浸腳

荊芥有驅風止癢、散汗作用，而紫蘇葉則能驅風散寒、利水，用嚟浸腳可以改善代謝及排汗問題，不過如對藥材敏感就要停止。

材料：荊芥、紫蘇葉各八錢、粗鹽約一茶匙

步驟：將各材料用熱水焗10分鐘，然後浸15至20分鐘，早晚浸一次。

支持本地創作：《八哥博士》

成日話一個人冇理想，同條鹹魚有乜分別！所以我好支持本土網絡創作人匿名望响網誌發表嘅漫畫故事，既得到唔少網友「十卜」，依家仲正式推出漫畫作品《八哥博士》添！顧名思義，漫畫係作者以自己所養嘅八哥狗波叔日常生活為藍本。《八哥博士》話畀我哋知，凡事堅持，真係有願望成真嘅一日o架，恭喜你呀！

叻太起底

年齡：30以上40未滿

職業：全職家庭主婦

家庭狀況：家有老公及4歲囝囝

網址：hk.myblog.yahoo.com/pug-kar

查詢：2265 8868