唔少人會趁今日佛誕去食齋，洗滌心靈！
潮流興素食，但原來素食習慣都有好多種，好似Karmen就係純素食者，只食蔬果和五穀類，唔食奶、蛋和肉類；Clara亦食齋，卻食奶同蛋。佢哋話素食好處多，事關素食食品含豐富纖維素，脂肪量又較少，食後容易有飽肚感，難怪佢哋體重Keep得咁好。
注重吸收蛋白質
有日見到聖雅各福群會營養顧問及膳食服務嘅營養師Cora，把握機會請教佢。「素食食品營養唔差，但要注意蛋白質、鐵質、維他命B12、鈣質、維他命D嘅吸收，尤其係唔食奶同蛋嘅純素食者。肉類所含嘅動物蛋白質，相對地較植物蛋白質更易為人體吸收，再者動物肉類含有較高鐵質，係人體健康重要嘅元素之一。植物蛋白質可於豆類等食物中搵到，每80至120克豆類提供相等40克肉類嘅蛋白質，對腸胃有問題者、年輕人及進食有困難者可能不太適合，或會產生過多胃氣，若食得太多豆類食品，仲好易放屁。」
此外，Cora仲話維他命D幫助身體吸收鈣質，奶素食者可以從奶類吸收維他命D，蛋素食和全素食者應以硬豆腐、豆腐花，加鈣豆漿、黃豆類食品，及綠葉蔬菜等補充鈣質，而曬太陽同做運動，亦可使皮膚製造維他命D以防骨質流失。「奶素食和全素食者特別容易缺乏鐵質，要特別留意並同時進食含豐富維他命C嘅食物，如番茄、西蘭花、水果等，以助鐵質吸收。不過，維他命B12卻只在動物中搵到。無論如何，要食得健康，食物配搭必須多元化，有需要時可諮詢醫生或營養師嘅意見。」
小心熱量超標！
對於坊間形形色色嘅素食，如芋頭魚、齋滷味等，Cora叮囑我要留意當中熱量。原來素食食品多係黃豆類製品，加上經油炸，部分更會「重手」調味，相對地熱量同脂肪量都好高，唔懂得節制，一樣易肥！
是日佛誕，善哉善哉！
叻太起底
年齡：30以上40未滿
職業：全職家庭主婦
家庭狀況：家有老公及4歲囝囝
攝：Owen
鳴謝：聖雅各福群會營養顧問及膳食服務經理/
高級營養師黃綺雯