近年手機唔係直身就係滑蓋，部部一式一樣，要外形破格都幾難搵！不過世事無絕對，好似新到的水貨機Motorola Backflip，就破天荒玩「後摺」，機面屏幕、機背鍵盤，正宗「拗出唔拗入」，顛覆手機傳統！

傳統上，手機外形離不開直身、滑蓋、側滑蓋、摺疊及旋屏五大類，最後兩類便分別由摩記「摺龜」及V70創先河，因此摩記玩款，絕對有先例可循。姑勿論今次Backflip能否帶領潮流，但「後摺」概念就夠晒話題性！

$4,880

有齊Facebook、MySpace、Twitter、Picasa等小工具，如同交友網站集中營。

Backflip自拍易

摺機給大家的概念都係屏幕、鍵盤藏於機內，要打開才能使用。Backflip破格之處，就係將邏輯完全反轉，改玩「向後摺」，摺合時前方是屏幕，背面是QWERTY鍵盤；當完全翻開後，就變成下方打字上方瀏覽，外形如同側滑的QWERTY手機一樣。最弔詭的是，鍵盤並非純英文按鍵，左下角還設有500萬像素鏡頭連LED燈，雖然看上來有點異相，但翻開自拍時就好方便，設計明顯花過心思。

繼CLIQ後，終於再次見到Motoblur介面，5版頁面可任放Widget。	「Happenings」小工具可同步更新朋友狀態，唔怕Outdate！	屏幕並非Multi-Touch，縮放網頁要靠內置放大鏡。

靈活Touchpad

操作方面，除了打字專用的QWERTY鍵盤，基本上都係依賴其3.1吋Touch Screen，雖然尺寸唔算大，但反應靈敏，而且解像度達HVGA級數，細細哋睇落仲靚。若嫌篤芒容易印滿手指模，它還有一項破格設計，就是把Notebook常見的Touchpad移植到屏幕背後，當用戶雙手揸機時，食指好自然就會放到此處，這時只需郁動指尖便能移動屏幕鼠標，再以手指公篤芒操作，習慣後會較常用的Trackball更靈活。

沿用Android 1.5影相介面，只提供簡單的場景及曝光模式，好彩支援自動對焦。	鏡頭連閃燈竟然藏身於QWERTY鍵盤左下方，好處係翻開時自拍更容易。	雖然記憶卡槽設於電池上方，但支援熱拔插，唔使拆電都換到。

Motoblur再現

手機另一賣點是內置連早前Milestone都冇嘅Motoblur介面，首頁一開五，任由用戶擺放各式Shortcut或Widget。預設的主頁除有齊時鐘、天氣預報及短訊外，還有一個「Happenings」小工具，可同步顯示Facebook、MySpace及Twitter內嘅朋友更新，睇到新消息就可即時回應，毋須逐層Menu入咁麻煩！惟留意到港的只是美版機，雖然睇到中文網頁，但就冇提供中文手寫及輸入法。

厚度跟兩毫子硬幣直徑相若，以QWERTY機款嚟講唔算厚。	屏幕背脊就係Touchpad，手指輕掃就能移動鼠標。	這個角度可看清「後摺」後嘅形態，電池蓋設於鍵盤背後，另留意機頂有3.5mm插口，毋須轉插就用到耳筒。

機檔案

制　　式︰GSM四頻、WCDMA 850 / 1900 / 2100MHz

操作系統︰Android 1.5

屏　　幕︰3.1吋26萬色TFT，320ｘ480解像度

鏡　　頭︰500萬像素自動對焦

記　憶　體︰配備2GB microSD卡（最高32GB）

對外連接︰藍芽2.0、USB 2.0、7.2Mbps HSDPA、Wi-Fi

通話時間︰350分鐘

備用時間︰315小時

體　　積︰53×108×15.3mm

重　　量︰133g

查詢︰2396 6380