細個去沙灘或郊遊時，總見到班飛仔托住卡式Hi-Fi炸機，時至今日卡式錄音帶都唔見晒，但80年代的肩托式Hi-Fi竟然再現香港。由Altec Lansing精心打造的iMT800手提喇叭，將原本卡式錄音帶插位換成iPhone Docking，歌照播、機照托，實行古老當時髦。

機身有半米長的iMT800手提喇叭，驟眼睇似足大牛龜卡式機，卻將80年代Boombox懷舊造型與時尚的iPhone/iPod結合，機頂和機身兩邊更特別加設手抽位，打橫打直點拎都咁就手，入8粒大電就可播足30個鐘，有機會再次掀起復古風潮。

一按切換輸入

其實以前見過不少復古iPod喇叭，但一係抄得唔似，一係兼容性不足，今次iMT800終於有外表又有內涵，最細心是將中央的卡式錄音帶位變成iPhone插座後，仲可以「落閘」固定iPhone以防跌出，值得一讚。加上新機除了兼容iPhone和iPod外，機頂另附兩組3.5mm AUX-in音源輸入，可同時接駁MP3機和手機，切換音源一按搞掂。

強勁高中低單元

玩開iPod喇叭的用家都可能會發覺，巿面上大多數手提喇叭均以輕薄便攜為主，但iMT800卻反其道而行，採用巨型機身，帶出街好似托住包米咁重，要型確是要付出代價。不過亦由於有更多空間增加單元尺寸和數量，令音色比一般iPod喇叭強勁和清晰，尤其是左右聲道各分拆出1吋高音單元、3吋中音系統和5.25吋重低音喇叭，出街炸機終於有「嘢嘢揼心口」的震撼。

7級EQ調控音效

此外，用家還可像以往操作卡式機般，以機面按鈕選曲及調校音量，甚至接收FM電台頻道，獨有7級EQ均衡器，按各人喜好調校高中低音域輸出。嫌按來按去麻煩的話，更可抽出藏於機頂的匙扣式遙控器操作，集復古外形與潮流科技於一身。最過癮是在睡房用完濕電播歌，入齊8粒大電即可帶部機到沙灘開派對！