世界末日到了嗎？天氣反覆成咁，好容易患上感冒，又係靚湯出動嘅時候，幫一家人增強抵抗力！

春天係感冒高峰期，囝囝啱啱患咗感冒，亦傳染埋畀我，成屋都係病菌！睇中醫時，我多口問吓點解囝囝咁容易中招？葉英良註冊中醫師話：「小朋友免疫系統發育尚未成熟，適應力差，抵抗力自然較弱，比成年人較容易患上感冒。幼童乃純陽之體，新陳代謝十分旺盛，容易出汗，出汗時如果吹風，又或衣物過多，令發汗不暢，亦易發外感。小兒感受外邪，容易發熱甚至高燒，所以要積極預防。不過幼童進補不能過於燥熱或猛烈，平補之品較宜，北芪、淮山、白朮、羅漢果、鱷魚肉、太子參、玉竹、百合等，都係唔錯嘅保健中藥。」葉醫師仲教我兩款有助增強抵抗力嘅保健湯水，一家大細都啱飲o架！

北芪防風白朮鱷魚肉湯（4人分量）

材料：北芪1両、防風5錢、白朮5錢、百合1両、陳皮1錢、鱷魚肉半斤、蜜棗3粒

煲法：清水12碗煲2小時

功效：補益肺氣、健脾祛風、潤肺化痰。

太子參淮山玉竹湯（4人分量）

材料：太子參1両、淮山1両、玉竹1両、羅漢果1/3個、生薑3片、瘦肉1斤、紅棗5粒

煲法：清水12碗煲2小時

功效：健肺滋陰、清利咽喉、潤肺化痰。

零食應少吃！

葉醫師話小朋友鍾意食零食，好似糖果、朱古力、汽水、雪糕等，雖然美味可口，卻會損傷脾臟，影響生機，令免疫力下降，又惹痰生濕，外感之時吃零食更會惹痰濕，引致咳嗽。所以我哋做父母嘅，一定要好好睇實佢哋，咪畀佢哋亂食嘢呀！

靚媽咪支持環保！

叻太向來支持環保，所以當知道本地藝術家林皮、Winston Lau、Dennissoap藉母親節將廚品、雜物、膠樽、雜誌等舊物翻新，設計成一系列以環保為主題嘅家具响黃埔新天地作展覽，就即刻將呢個消息係咁「推」！我仲知綠慧公社一班環保媽媽會响5月8日活動揭幕禮中分享佢哋嘅環保心得及趣事，以及示範以天然物料製作日常用品，好有意思喎！此外，顧客凡於展覽期間於黃埔新天地任何商舖消費滿$400或以上，憑2張不同商舖之即日機印發票，即可免費換領由上述一班藝術家共同設計嘅限量版環保袋添！

「家+愛環保‧創意環保傢俱展」

日期︰5月8日至23日

時間：12:00nn至10:00pm

地點：黃埔新天地家居庭地庫

查詢：2121 8344