做人最緊要有夢想，當年如果唔係一班打工仔極力爭取，就唔會有聽日嘅勞動節日假期。

現時好多人為咗生活，由朝做到晚，捱夜開OT更是少不免，趁住勞動節前夕，就等小記問吓「日做夜做冇停手」嘅打工仔，有乜嘢勞動節願望，話唔定今日嘅奇想，日後真的可以願望成真。

做一日老闆

鄧先生（經紀）：「打工無非都係希望有朝一日可以做老闆，所以我覺得勞動節嗰日可以試吓將員工同老細調轉崗位，畀我哋過吓老細癮之餘，等老細都感受吓我哋平日做嘢有幾辛苦。」

鄧先生（經紀）

鍾小姐（OL）

放一星期假

鍾小姐（OL）：「平時做得咁辛苦，又少時間陪屋企人，所以最希望可以好似內地咁有黃金周，一齊放成個禮拜假，咁就可以同屋企人去旅行，唔使夾假！」

萬事有「雙糧」

陳先生（技術員）：「我哋呢行工作時間長，收入又唔穩定，最想當然係提高工資，時薪$33都係低，起碼要$50。若然僱主真係重視呢個節日，最好就喺勞動節出雙糧，咁咪皆大歡喜！」

以「傭」代勞

林太（秘書）：「對於我哋呢啲結咗婚有仔女嘅，返工忙公事、放假喺屋企又要做家務，根本冇停手，政府最好喺勞動節派人到每個家庭打掃，等我哋可以乜都唔使做，真正抖番日！」