早前孔教學院申請將8月27日孔誕列為法定假期，竟然獲得天主教、佛教、道教、孔教、基督教協進社及伊斯蘭教博愛社6個宗教團體和民建聯的支持。成事的話，便有機會「犧牲」最後一日復活節假，讓位給「孔聖爺」，有人甚至提出如果可以畀大家自定假期就最開心啦！
參考本地或海外的假期，大部分都離不開同宗教、立國、打勝仗、皇室誕辰和新年相關的節日，不過正所謂「各處鄉村各處例」，咁到底香港人又最想邊日放假，小記就精選出五大網友最想加入嘅假期，相信都有一定嘅代表性。
五大至Hit候選自定假
第一位：自己生日
生日對每個人嚟講都係大日子，雖然個個人嘅生日日期不同，不過如果可以的話，最多人都想喺自己生日嗰日有假放。
第二位：結婚紀念日
結婚係人生大事，平時日做夜做冷落伴侶，為咗令夫妻關係更和睦，有人提出好應該批一日假畀已婚人士慶祝。
第三位：萬聖節/盂蘭節
傳統上，盂蘭節最好唔好去夜街，但西洋鬼節卻愈夜愈美麗，如果兩日都可以放假的話，咁無論各位想靜靜地匿喺屋企，抑或出街「撞鬼」都有藉口。
第四位：婦女節
3/8婦女節就算唔放足一日，都應該學吓外國咁放半日啦！不過最近國內有人提出整多個3/7少女節，以表明自己未達「婦女」的年齡。咦？咁講法，介乎兩者之間嘅「中女」咪好尷尬？
第五位：外傭節
星期日到皇后像廣場或維園走一趟，就知香港有幾多外傭，佢哋都好應該有一日專屬嘅假期，話唔定放完仲可以改善埋僱傭關係添。
香港假期全球排尾四
唔講唔知，有國際勞工組織的研究指出，香港僱員所享有嘅有薪假期數目（12日勞工假+7日年假），喺全球103個國家或地區中排尾四，只比新加坡、菲律賓和墨西哥好些少，而全球最多公眾假期嘅哥倫比亞，單係勞工假就有18日，計埋有薪年假更有接近30日。
市民點睇
鋼琴教師Jane：「最好可以將啲假期駁埋放，咁就可以同屋企人去個長旅行。」
秘書Candy：「雖然孔子生日唔關我事，不過多日假放就梗係好事啦！」
售貨員Zoe：「每逢公眾假期我哋都要返工，所以基本上放邊日都冇咩所謂。」