Sega推出由四大型男擔正嘅《人中之龍4》，除原有第一男主角桐生一馬外，仲加入秋山駿、冴島大河同谷村正義嘅戲份，更重要係今集嘅打鬥同調情場面比過往更逼真多元化，甚至連當紅AV女優Rio都會上陣客串當夜總會小姐，單憑這點已有足夠吸引力。

今集唔講桐生一馬點樣帶住女仔闖蕩江湖，反而係透過大佬級桐生一馬、錢莊老闆秋山駿、殺過18個人兼坐過25年監嘅逃犯冴島大河，以及表面睇嚟同陳總一樣咁貪嘅年輕刑警谷村正義，交織出發生在神室町內嘅愛恨情仇。

場景會隨時間變化

雖然遊戲背景回歸到以東京歌舞伎町作為設計藍本嘅神室町，表面唔夠新意，不過今次就將神室町立體化，睇到日夜或天氣變化外，仲將場景延伸到大廈屋頂、後巷、地下停車場等陰暗角落，等大家見識埋呢個紙醉金迷煙花地嘅另外一面。至於神室町所出現嘅商舖，好多都係真有其店，大家比較熟悉嘅食店就有和民、松屋等，夜場就有Karaoke館，另外仲有真實嘅便利店、藥房同雜貨店，似足翻版歌舞伎町。

拜師學習不同絕技

喺街上打爛仔交係《人中之龍》系列必備嘅元素，除普通拳來腳往外，亦可以隨街拎起唔同物件做武器，最爆都係孔武有力嘅殺人犯冴島大河，佢可以舉起街邊部電單車做武器，夠晒誇張。當打低敵人或者完成支線故事後都可以得到經驗值，仲可以跟所屬師傅學到唔同嘅技能，好似桐生一馬可以使出「古牧流空手反擊」、秋山駿可使出「頭顱粉碎擊」等絕技，要幾暴力有幾暴力。另外亦唔少得過往都有嘅「天啟」系統，即係主角會從身邊發生嘅事物領會出新招，領會過程有時都幾爆笑，可以緩和一下暴戾氣氛。

成人情節樂而不淫

《人中之龍》系列大賣遊戲自由度高，今集主角可以帶同小姐一齊去泡湯，大家只要狂按「○」鍵，就可以幻想出小姐浸浴嘅情景，不過都係點到即止，浸完溫泉仲可以打番場友誼乒乓波添。成人向嘅《人中之龍4》當然亦有唔少踩界內容，好似在神室町有間由女藝人矢口真里擔任按摩師嘅按摩店，畀錢入場順利完成「治療」就可恢復體力同熱血計；今集更特意招募8位美女擔任遊戲中的夜總會小姐，當中最為人熟悉嘅應該係AV女優Rio，不過唔好期望遊戲內有過激嘅演出！

機檔案

類型：動作冒險

開發：Sega

平台：PS3

日期：已推出

售價：約$400