關於Google Maps Street View嘅新聞真係每隔幾日就有，好似兩星期前台灣Street View有單「唔覺意」影到裸女；早幾日連地圖都唔敢標示嘅英軍特種部隊秘密基地都上埋鏡。啱啱喺香港新推嘅Street View「街景服務」只要用心去Click吓，一樣會有「開心大發現」！
以真人實景作賣點的Google Maps Street View，於3月中正式在香港推出，各位可以在Google Maps上睇見街道的實景，感覺真實得多。雖然話有智能程式自動將拍攝的相片進行拼貼，以及為相中人面打格仔，不過偶然都會有一些蝦碌鏡頭出現，依家就帶大家睇睇。
古仔有面
兩張相嘅共通點除咗巴士車身都貼上電影廣告外，戲中主角古天樂都無獨有偶冇畀人打格，唔通因為佢夠靚仔！
黃色招牌
油尖旺一帶都有唔少「黃色招牌」，呢幅「無遮無掩」算係少見。
人肉宣傳
Google香港總部設於銅鑼灣時代廣場，員工乘機落街舉起「Google」紙牌做宣傳，Hard Sell咗啲囉！
拍攝車自拍
為了拍攝 香港街景，拍攝車足足在香港走了6,000多公里，結果連佢都唔覺意「自拍」留低紀錄。
差人查證
警員在街頭截查身份證每日都有，不過原來「街景」都有影低，不過人樣就被模糊化。
身首異處
「街景」服務可以360度任轉，地下同天空都睇晒，這全靠多張相片駁埋先做到咁嘅效果，但有時駁得唔好就會好似呢張相咁，搞到行人身首異處，驟眼睇都幾恐。
專家有Say
G-World Lo哥
街景服務在手機上都可以玩到，以後搵地方時亦可以順道睇吓有乜蝦碌相。
Google產品經理
胡皓霖
收到用家舉報有問題的相片後，我們會即時處理，如查明屬實，便會刪除有問題/侵權的相片。
外國奇異街景
現時歐、美大部分地方都已提供街景服務，網友亦搵出唔少奇異街景，有人通街小便、有人爬牆爆格、甚至連疑似外星人和靈體都一樣影到。
