點解隻《God of War：Collection》出咗兩、三個月，仍然可以排喺PS3遊戲銷量榜前三名？好大原因係唔少玩家諗住先玩番頭兩集故事，再直落玩埋就快推出嘅《God of War 3》。今集遊戲內的主角Kratos，將用上更血腥、更殘暴嘅手法去搵出背叛佢嘅諸神復仇，仲會一直殺到去眾神之神宙斯度！
未介紹遊戲前，先喺呢度同大家重溫番頭兩集嘅故事內容。第一集講述Kratos為戰神Ares賣命，但點知被害到家破人亡，毅然踏上復仇之路；到咗續集，Kratos選擇返回人間幫助斯巴達與眾神之神宙斯為敵，今集將延續呢個史詩式嘅希臘神話。
唔再需要神
第三集嘅故事重心唔再講「我們需要神」，而係話諸神因為與泰坦族爭權而導致生靈塗炭，Kratos出手幫泰坦族向所有背叛過佢嘅神靈展開反擊，以暴易暴。故仔有晒鋪排，用上成個希臘神話做參考，可見遊戲開發商野心都幾大，呢方面真係比出咗無耐，但玩法好類似嘅《Dante's Inferno》更有心。雖然講今集會係三部曲嘅終結篇，但開發小組就事先張揚話《God of War》系列冇咁快玩完，至於將來會有乜嘢新故事，現在當然要先賣個關子。
場景靚幾倍
由於之前兩集都只係在PS2平台上開發，今集終於轉到PS3，畫面方面當然有好大改進，開發小組仲話細緻度比前作高幾倍。為咗開發《God of War 3》，今次更用上最新的3D繪圖技術，以及新開發嘅遊戲引擎，來呈現出遊戲內極出色嘅動態光影效果，而且在高速移動下，場景、角色同動作都冇任何跳格或變形，同之前PS2版相比，確實出色得多，尤其係面對體形極度龐大嘅諸神時，就更能感受到當中嘅逼力！
招式極殘忍
《God of War 3》嘅操控跟前一集都幾類似，但就加入好多型到震嘅新招。在遊戲內，玩家可以控制Kratos使出空中擊殺，在半空中捉住人面鳥跨過斷崖，亦能夠用上Icarus Wings在空中滑翔；殺神嘅方法就更加殘忍，例如可以將敵人嘅眼睛監生扯甩，又或者扭甩佢個頭，一切都取決於大家按掣夠唔夠快手。
更易出絕招
當用普通招式攻擊頭目一段時間後，畫面上就會出現按鈕提示，在限定時間內正確輸入指令就能使出殘忍嘅絕招，不過今集按鈕顯示位置會對應番遊戲手掣嘅真實位置，即係話冇咁易按錯。至於出場嘅諸神角色都相當之多，由懷有殺妻深仇大恨嘅冥王Hades、半獸妖精Satyrs、半人馬Centaur等，全部造型都設計得好神似，如果對希臘神話有一定認識，大開殺戒時就更易投入。
機檔案
類 型： 動作
開 發： SCE Santa Monica Studios / SCEA
平 台： PS3
推出日期： 3月16日
售 價： 待定
查詢：2341 2356