04/03/2010

播放本新聞相關短片

SEGA明星賽 翻兜孖寶賽車

之前SEGA孖住任天堂合作推出兩隻奧運遊戲,所以當小記見到SEGA出咗隻玩法好似《Mario Kart》(《孖寶賽車》)嘅《Sonic & SEGA All-Stars Racing》,一啲都唔意外。今次SEGA 明星賽玩法同樣簡單,畫面色彩繽紛,而且又可以用道具掟對手,新玩家都好易上手。

不過最抵玩都係登場角色勁多,連好多大家估唔到嘅SEGA經典角色都有份撐場,童年回憶返晒嚟,只要大家肯花少少時間煲機,其實都唔難買齊成隊22人嘅Dream Team。

22人夢幻組合

睇見遊戲以《Sonic》掛頭牌,Sonic、Shadow、Amy Rose、Dr. Eggman等經典角色都順理成章地參戰,另外亦唔少得《Super Monkey Ball》的AiAi、《Samba de Amigo》的Amigo、《Space Channel 5》的Ulala、《Banjo-Kazooie》的Banjo-Kazooie(Xbox 360版獨有),甚至連唔係走開Cutie風格嘅角色如《Virtua Fighter》的結成晶、《莎木》的芭月涼都會上場露兩手,無論係邊個年代嘅機迷,都應該可以搵到自己喜愛的角色。可惜遊戲開始時唔係全部角色都有得用,主要得Sonic班老友,其餘角色如結成晶、芭月涼等就要靠打比賽賺錢買番嚟。

執道具掟對手

遊戲玩法極似《孖寶賽車》,基本上大人、細路哥都可以即時上手。不過《Sonic & SEGA All-Stars Racing》就更加易玩,至少今次飄移加速都比較簡單,唔使將操控桿兩邊搖,好容易就出到。當然各位亦可以在賽道上執起道具掟對手,道具方面除了有超加速、防護罩等幫自己外,其餘的主要是作攻擊之用,好似拳頭攻擊、炸彈、導彈等,睇準時機使出絕招,就有機會反敗為勝。至於要揀邊個遊戲角色參賽,除了根據自己的好惡外,唔同角色架戰車都有唔同特性,好似Sonic架車速度快,但好易被對手擠出賽道,不過最屈機要算係Ulala,因為佢竟然係坐住架飛船出賽。

八人網上對戰

大家玩落就知道電腦玩家唔易對付,要使出道具惡搞對手外,仲要識得搵捷徑,皆因唔少賽道都隱藏了捷徑,明白箇中竅門就可慳番幾秒時間;而且每個角色都有各自的超必,如果運用得宜,就好有機會從後反超前。遊戲內設有十多條好有特色嘅賽道,每場賽事都有八位角色同時出賽,更分為計時賽、格蘭披治賽同Mission Cup,又係熟口熟面的設計。另外;遊戲仲可以支援到四人分割畫面鬥車,連線時則可以做到八人對戰,玩落又確實幾過癮!

機檔案

類  型:賽車

開  發:SEGA

平  台:Xbox 360/PS3

推出日期:已推出

售  價:$288

查詢:2620 6667

Brian