正月十五都過咗,喉嚨又成日隱隱作痛……
新年食得熱氣嘢多,有啲喉嚨痛,早幾日去探姑婆,佢見我聲沙沙,即刻搬出醃咗30幾年嘅鹹柑桔沖鹹柑桔水畀我飲。嘩!果然好嘢!一飲喉嚨舒服晒,搞到我都心郁郁想向屋企盆四季桔埋手,原來醃鹹柑桔好簡單o架咋!
叻太醃桔
步驟:
Step 1.將四季桔連椗剪落嚟,千祈唔好就咁摘,因為桔皮撕爛咗會容易發霉。
Step 2.先喺玻璃樽底鋪一層海鹽,然後將四季桔逐粒鋪喺海鹽上面。
Step 3.再喺桔面倒入海鹽,直至覆蓋第一層柑桔;就係咁一層鹽、一層桔咁鋪到頂,最後以海鹽封頂。
Step 4.以保鮮紙封口。
Step 5.於玻璃樽外貼上醃製日期,放喺陰涼嘅地方,最快一年後可以食用啦!
鹹柑桔有乜好?
註冊中醫師Terri Chan話,醃製過嘅四季桔有理氣化痰平肝功效,而且同陳皮一樣,醃得愈耐、功效愈好,大人細路都啱食,對於初起咽喉腫痛、聲沙、感冒初發都好有用!不過,鹹柑桔唔係中藥,若服後效果唔明顯,就要搵註冊中醫師幫手喇!
學吓打小人先!
星期六係驚蟄,以前聽阿媽講,呢日大地回春,喺地下冬眠嘅蛇蟲鼠蟻會捐番出嚟搵嘢食,而且呢日仲要祭白虎打小人!究竟白虎係咩,同埋點樣打小人就唔係好知。聽住喺灣仔嘅表姑媽講,灣仔民間生活館喺驚蟄嗰日會搞個活動,詳細講解點樣祭白虎、打小人儀式同埋背後嘅故事,仲會帶我哋去鵝頸橋實地考察添!好鬼Discovery Channel呀!
「送人入虎口:驚蟄祭虎遊」
日期及時間:3月6日 10:30am至12:30pm
地點:聖雅各福群會總會
收費:$60
查詢:2835 4376
叻太起底
年齡:30以上40未滿
職業:全職家庭主婦
家庭狀況:家有老公及4歲囝囝