雖然暫時未有消息幾時至推出3D BRAVIA電視，不過Sony就先帶來兩款曾在今年CES展覽中現身的NX同EX系列新機，兩款BRAVIA電視外形靚仔兼且顯示效果出色外，仲支援埋BRAVIA Internet Video & Widget，連接上網就可以同時睇埋網上的娛樂及資訊內容，唔使屈喺個20吋電腦芒前睇，爽！

今次Sony帶來的NX800及EX700系列BRAVIA電視，外形設計都落足工夫，尤其係定位較高的NX800，就用上嶄新的Monolithic設計概念，外觀更搶眼。

NX800加上磨砂鋁金屬底座，夠易認。	EX700外形設計同樣出眾。售價待定	EX700加入了光源及熱能感應器，操作時更省電。
兩個系列的新BRAVIA電視都已內置無線網絡及LAN端子。

NX800：6度斜芒 睇得舒服

究竟點樣先至係Monolithic設計，Sony就話當中有三大元素，分別係「On/Off Conscious」、「6 degree Upward Style」同「Contrast of Materials」。首項元素係指無論在開啟或備用狀態下，電視機外觀都同樣吸引；第二點就係可以讓用家將電視屏幕向後傾斜6度，咁樣就睇得更舒服；最後一點係指NX800可配合鋁金屬底座，企得更穩陣之餘，亦有助提升設計品味，總括來說就係令電視機更容易融入現代家居之中。

操作指示燈設在前方，而操控按鈕則設於機背。	容許用家將畫面向後調校6度，睇得更舒服。	即時連上on.tv測試，播片效果都算合格，最重要係可以收睇到最新最快嘅資訊。

EX700：熱能感應 自動熄機

撇除未有3D顯示能力外，NX800跟EX700系列的顯示質素都幾高，兩者同樣搭載最新的BRAVIA Engine 3影像處理系統，加上用上Edge LED背光技術，畫面色彩亮麗自然，對比度又夠高。稍為唔同嘅係NX800用上200Hz MotionFlow暢動流技術，較只用100Hz嘅EX700在顯示高速移動畫面時，有更出色嘅表現。不過EX700就內置咗光源及熱能感應器，後者可以感測到電視機前方是否有人在觀看，當用家離開電視機範圍一段時間更會自動關掉屏幕，再次行近又會自動開機，既省電又環保，智能家居生活其實應該係咁樣。

放大圖片	可因應個人喜好及需要，加入不同的Internet Widget。	電視機遙控器上已加入Internet Video選項，一按即可接上相關介面。

即睇on.tv串流影片

現時好多用家都會不時上網瀏覽最新的娛樂及資訊內容，唔通睇電視都要帶住部Netbook跟身？所以今次Sony便順道在港推出BRAVIA Internet Video & Widget功能，可以透過電視機的內置無線網絡或經由LAN線上網，收看網絡串流影片。其中「Internet Video」一項，裏面就有齊由YouTube、Videocast.com、Wired等著名網站提供嘅串流服務，而且不久將來更會加入本地內容，on.tv就是其中之一，到時大可舒舒服服攤在梳化，收看on.tv最新嘅新聞及娛樂資訊。同時，用家可在畫面上訂閱不同的「Internet Widget」資訊小程式，好似Yahoo! Weather、Facebook、Twitter，甚至連FIFA World Cup 2010 Countdown都有，方便過上網慢慢搵料。查詢：2345 2966

一按即可連上YouTube睇片。

放大圖片