去年三月一部激薄Adamo，徹底打破Dell向來樸實嘅形象，原來Dell都一樣潮得起。事隔不到一年，Dell再為Adamo帶來新型號Adamo XPS，既保留經典嘅9.99mm纖薄機身，再加入手指一掃開機及型到震嘅座枱設計，比當初Adamo更出位；但機價亦幾乎翻了一翻，要型，係有代價嘅！

當Dell旗下的手提電腦都以抵用做賣點時，Adamo系列就以巧奪天工嘅製作技術，以及矜貴用料來取悅不甘於平凡嘅用家，雖然身價達$25,999，但對於設計近似藝術品嘅Adamo XPS，相信仍不乏捧場客。

機身最薄部分只有9.99mm，薄得誇張。	鍵盤大小接近Full Size，手感不俗。	打開機蓋後，鍵盤會向上傾斜，打字時都幾就手。

特別座枱設計

Adamo上次以激薄嘅9.99mm厚度現身，雖然數字上未及MacBook Air，但機身造得相當精緻，用原塊鋁合金打造，外觀跟觸感都同樣超凡；不過略嫌機身設計比較傳統，未夠突出。到第二代Adamo XPS就在維持9.99mm的厚度下，加入相當破格嘅機身設計：顯示屏與鍵盤之間嘅鉸位不是設在末端，而是縮入顯示屏內約一吋的位置，打開機身時，鍵盤便會自動微微向上翹起，但又企得好穩，敲打鍵盤的感覺亦同樣實淨。

DVD±RW光碟機都順理成章地換成外置式設計。	Dell Adamo XPS配備13.4吋16:9屏幕，觀感出色。	只需用手指在機身前方一掃，亮起藍燈後便會打開鍵盤，開機都型過人。

一掃開機夠型

Adamo XPS另一特別設計是其屏幕嘅打開方式。一般手提電腦只要在顯示屏中央正前方向上抽起就可揭開屏幕，不過Adamo XPS就唔一樣，因為關上屏幕時鍵盤會嵌入於屏幕部分，無論點樣用力撬都無法打開。但原來Adamo XPS受軟不受硬，只要用手指在機身最前方輕輕一掃，當藍燈亮起後，鍵盤部分就會緩緩落下，型得嚟又幾搞鬼，甚至連Adamo XPS嘅黑色包裝盒亦同樣造得精緻，仲參考首飾箱設計，用家買機後都應該唔捨得隨手丟棄。

機身設備都算齊，配備了200萬像素視像鏡頭。	Adamo XPS效能跟一部薄型嘅CULV手提電腦差別不大。	機底就用上太陽形嘅散熱孔，幫助散熱。

配128GB SSD

考慮到機身內的可用空間以及散熱等問題，好似Adamo XPS造得咁薄嘅機種，理論上都難以放入極高階配備。但Adamo XPS的配備總算不錯，以超低電壓版Intel Core 2 Duo SU9400處理器，配搭4GB記憶體以及128GB SSD，效能一啲都唔失禮，比較弱嘅一環係內置嘅圖像晶片，當然如果只係用來上網或睇碟，又唔會覺得有問題。至於Adamo XPS所採用嘅13.4吋16:9顯示屏，色彩顯示出色，睇得好舒服。

機檔案

處理器：Intel Core 2 Duo SU9400（1.4GHz）

記憶體：4GB DDR3

硬碟機：128GB SSD

光碟機：外置DVD±RW燒碟機

顯示屏：13.4吋HD 16:9 WLED 720p

體　積：340×27２×9.99mm

重　量：1.44kg

查詢：2969 3113