每逢過新年，大家都會依照九宮而重新布置家居，希望提升運勢、闔府平安；照咁睇，車主一族或有心虎年出車嘅人士，都要好好籌算一番。玄學家林炳南師傅就有以下嘅虎年貼士畀各位駕駛一族，出車或出牌都照顧得到，祝願大家虎年順順利利、出入平安！

首先要提醒嘅係肖虎人士，皆因佢哋今年犯本命太歲，屬是非之年，較易同人有摩擦，尤其是香港路面日日都逼到爆，咁講法，唔通虎年駕駛者今年就特別多是非？唔使驚，林師傅自有化解方法。

林炳南師傅提醒肖虎朋友今年犯太歲，揸車就要多多留心及忍讓。

放大圖片

虎人犯太歲 有4無慮

首先，林師傅提醒肖虎朋友今年犯本命太歲，所以除駕駛時多加小心及忍讓外，仲建議首選「4」字車牌，英文字母就揀「D、M、V」，配埋黑色車就最Match，林師傅話：「4字屬生氣位數字，有旺財及事事順利嘅效用，有助肖虎朋友增加運勢。」至於其他生肖又應該點夾？睇左表就一清二楚啦！

「4」字車牌有催運作用，最啱今年犯太歲嘅肖虎車主。

至於車牌字母方面，肖虎人士最好揀「D、M、V」。

黃氣車廂 化解衰氣

除咗肖虎，肖蛇、猴及豬嘅人都要提高警覺，林師傅話：「以上四個生肖嘅朋友，喺庚寅虎年都係犯太歲，揸車人士就更要留神，我建議可以喺車廂放黃色物件，例如公仔、咕o臣、香精等，因為黃色喺五行中屬土，作用係避免金、木、水及火相撞，喺車廂中放一些黃色擺設，就正有化解之意。」

黃色車有利肖兔、馬、雞嘅人士，所以鮮黃保時捷911就Fit晒。

肖狗及肖豬嘅車迷，不妨考慮綠色車，而賓利Continental GT又勁又夠型。

後排左邊 敬請「留」心

桃花運唔只代表愛情運，其實泛指人緣，有桃花運者，人際關係自然特別好，在公在私都順利過人啦！林師傅話西位係庚寅虎年嘅桃花位，想有桃花運行，車主大可將心形物品，例如公仔、朱古力等擺喺車廂後排左邊。順便提埋過年入廟拜神買風車嘅話，大可將風車放喺司機位後面，有助催谷財運喎！

無論放心形咕o臣或朱古力喺後排乘客位，都有助提升桃花運。

想行運？除咗要布置家居，車廂格局都唔好忽視，犯太歲者不妨放黃色香精座。