星期六係初七人日，我哋打算同朋友開新春Party，仲準備咗好多好玩嘅派對遊戲！

睇獎門人遊戲節目，好多時都笑到肚爆，其實市面有唔少店舖售賣一啲搞嘢好玩嘅遊戲，好似旺角信和中心嘅激玩部落，裏面就有好多嚟自日本嘅Party Game，我最鍾意就係二人大衫袖呢個遊戲，以前獎門人啲賀年節目都有玩過o架！聽晚我要同叻生玩一次，睇吓我哋有冇默契先！

二人大衫袖 以二人為一組，一齊着住呢件Oversize嘅羽衣，後面嘅人負責伸出雙手，而前面嘅人就只可以凸個頭出嚟，然後由後面嘅人做指定動作，如餵前面嘅人食嘢、飲水等，場面爆笑。$78	雪糕層層疊 每人輪流疊雪糕球，睇吓邊個唔夠手力整瀉雪糕球，咁上家就可以得到雪糕筒上雪糕嘅分數。$268	杯麵拼圖 要求喺三分鐘限時內，將麵餅同餸菜砌成杯麵，砌錯成個麵就會爆開，最搞笑仲有原味、海鮮同咖喱味添！$138
雞同鴨講 玩到大家O晒嘴嘅雞同鴨講，玩法有啲似獎門人閂大閘。一班朋友分為幾隊，一人先喺21張表達卡中抽一張，再抽字謎卡，然後出盡渾身解數做提示，要對方喺指定時間內講出答案。$98	閃燈飛碟 玩法多多，其一係按着開啟掣後就着燈，你同Friend要鬥快襟熄開着嘅燈；又或者鬥快襟熄會發聲嘅燈，其他玩法，自己發掘！$188

查詢：3153 5151

舞龍舞獅夠熱鬧

新正頭，我最鍾意做啲好意頭嘅嘢，上網知道中環國際金融中心商場（ifc）除咗有「四星報喜」不倒翁為布置主題外，由即日至2月21日期間，每日都會有兩場中樂表演，而今日（2月19日）1:00pm至3:00pm，仲有囝囝最鍾意睇嘅舞龍舞獅表演，一於同囝囝、叻婆婆、叻公公齊齊去湊熱鬧，沾染一下喜氣洋洋嘅氣氛先！

查詢：2295 3308

點解初七係人日？

聽日係初七，既係人日，亦稱人慶節、人勝節、人口日、人七日。相傳女媧創世時，先造雞狗豬牛馬等動物，然後响第七日造人（同天主一樣），所以呢日係人類嘅生日。據記載早於漢朝開始有慶祝人日習俗，至唐朝就更受重視，皇帝會响呢一日賜群臣彩縷人勝（頭飾嘅一種），又會同群臣登高飲宴。雖然我哋依家冇呢啲習俗，但趁呢一日同親戚朋友開Party，都一樣咁開心啫！

叻太起底

年齡：30以上40未滿

職業：全職家庭主婦

家庭狀況：家有老公及4歲囝囝