今日係大年初三赤口日，唔拜年做乜好？不如遊車河行大運啦！玄學家林炳南師傅教路，東南方係今日嘅大利方向，夾啱時辰、再朝住呢個方向出發，有助提升流年運。香港地咁大，遊車河路線應該點度好？唔使愁，今日《車太炫》就為你指點迷津。
遊車河行大運要夾時辰，據林師傅教路，今日係丁酉日，最有利嘅方向係東南方，即係九龍地區將軍澳及土瓜灣一帶，港島區就係柴灣，而吉時為午時（早上11時至下午1時）及未時（下午1時至3時），有咁多時間，順道入廟拜神兼醫肚都得，筆者建議可先由大埔林村出發，然後朝住偏南方向走。
行運第1站
起點 林村許願樹
位於大埔林錦公路放馬莆村旁，一場嚟到，不妨到樹旁嘅許願亭許願，順便補充糧水，為下一段路程做好準備。
小貼士：
林錦公路一帶車位唔多，為人為己，唔好喺度停留太長時間，許咗願就走喇。
行運第2站
大美督食晏
11點左右喺林村出發，去到大美督附近，正好係時間醫肚，汀角路大美督巴士站對面嘅大美督村一帶就食肆林立，除咗有盆菜食，仲有多間泰國餐廳，初三都會照常營業o架！
小貼士：
大美督巴士站附近設有唔少車位，但要留意設有咪錶收費及免費停泊兩種，泊車時要睇清楚。
行運第3站
車公廟祈福
由大埔去九龍，點可以唔去車公廟轉風車，再買番個風車祈求新年轉出好運氣！不過每逢新年期間，車公廟例必人多，屆時廟內將會實施人潮管制，大家要多多忍讓。
小貼士：
廟外設有約20個咪錶位，實施人潮管制時，錶位可能被取消，不過車公廟對面嘅新翠邨都有停車場，各位不妨行多兩步。
行運第4站
火炭食乳鴿
如果咁快又肚餓，可以喺出九龍前，到火炭工業村山尾街嘅熟食市場（新正頭照常營業），歎番隻馳名嘅沙田乳鴿。
小貼士：
山尾街附近有多個時租停車場，而熟食市場旁邊嘅沙田工業中心亦有多層停車場。
行運第5站
黃大仙有求必應
經過獅子山隧道，終於駛入九龍，下一站首選黃大仙廟，誠心許願虎年順順利利。今年黃大仙廟已經完成大殿擴建工程，地方大咗，可以容納更多善信，唔似以前咁逼人。
小貼士：
雖然廟外有停車場，附近嘅黃大仙上邨及竹園邨又有多層停車場，不過相信到時都會幾逼，等車位要多加忍讓。
行運第6站
終點 紅磡觀音廟
最後一站去到九龍區東南位嘅紅磡，當地差館里家維邨旁邊就有座觀音廟，雖然觀音開庫喺正月廿六日，不過一場嚟到，梗係要入廟拜神、向觀音娘娘請安，拜得神多自有神庇佑。
小貼士：
差館里一帶路窄車多，雖然觀音街設有錶位，但相信等到位嘅機會唔大，不如行多兩步，去家維邨停車場泊車。
路線推介
林錦公路→吐露港公路→大老山公路→獅子山道隧道→龍翔道→聯合道→太子道西→馬頭圍道→蕪湖街→觀音街