搵齊法寶一粒鐘洗靚車

正所謂「年廿八洗邋遢」，唔只間屋，部車都係時候執番靚，你都唔想部車污糟邋遢，新正頭失禮人啦！今次就為各位車主一族搜羅到以下嘅洗車DIY新用品，易用之餘，價錢又合理，順道再醒你洗車小貼士，比起幫襯洗車屋，慳番唔少。就趁今日仲係年廿七，拿拿聲搵齊啱用工具，做足準備聽日幫部愛車洗白白啦！

咪以為DIY洗車就一定好大陣仗、攞苦嚟辛，最緊要有齊「架生」，又洗得其法，大約一個小時就可以搞掂，況且年廿八去洗車屋，一定大排長龍。順道提提大家，洗車時千祈唔好隨街傾倒污水，影響其他道路使用者之餘，仲有機會被檢控呀！

唔好咁心急，一開始就用濕布抹車身，為免刮花，應該先用雞毛掃掃走車身上嘅灰塵，之後再淋濕車身，跟住用稀釋清潔液，塗喺海綿或濕布上，再喺車身拭抹，就可以去除較深層嘅油迹及污垢，之後用清水「沖身」，最後用乾布抹乾，不過記住用同一方向抹，唔好來回或打圈，否則就前功盡廢喇。

車身清潔劑售價：$65 只需用兩個樽蓋嘅分量，放落一桶清水稀釋，再用海綿拭抹車身，就可以同討厭污迹Say Bye。	高級抹車布售價：$125 洗車後用一般毛巾抹車，有排抹之餘又未夠徹底，好多時仲會殘留水漬，呢款抹布可快速吸濕，慳番唔少時間及臂力。	去油膜玻璃水售價：$65 沙塵加油迹，都係清潔玻璃嘅最大敵人，咪咁傻用濕布抹就了事，分分鐘搞到塊玻璃花過老花鏡。應該用有去油膜功能嘅玻璃清潔水，就可以令玻璃光潔如新。
輪圈清潔泡沫售價：$58 用清水沖洗輪圈後，就可以用呢款清潔泡沫噴喺輪圈表面，等幾分鐘，畀時間啲泡泡分解污迹後，再用盒內嘅海綿拭抹，最後過埋清水就成事。