農曆新年好多親友嚟拜年，淨係用賀歲片招呼點得呀！我親手整咗個迷你全盒呀！
多得活力教育中心嘅老師Sandy悉心教導，只係用咗幾個鐘頭，我已經學識整迷你版精緻全盒同埋甜絲絲情人節朱古力，放喺玻璃飾櫃畀大家欣賞，嘩，呢次仲唔威呀！製作黏土作品嘅工具包括樹脂黏土、油性或Acrylic顏料、白膠漿、大頭針、Marker、罌粟子、沙紙等。步驟非常簡單，只要畀啲時間，個個都得做到！
彩甲工作坊
叻太向來勤於家務，成日整花啲指甲，八到有個手部護理工作坊，可以透過美甲師嘅專業示範及自己嘅美甲實習，於課堂中親身體驗美甲，課程內容包括專業手甲護理知識，包括光療樹脂植甲技術、矯正甲形、利用小工具或專業工具去除指甲邊緣死皮等，執靚雙手準備過新年啦！
手部護理工作坊
日期：2月6日
時間：10:00am至12:00nn
地點：中環干諾道中23號香林大廈
導師：資深美甲造型師Subie Chan
費用：原價$450、特價$158
查詢：2366 0783
奶奶請食鮑魚
下個禮拜有親戚來港探親，奶奶話要盡地主之誼，請大家食餐飯喎！我當然發揮小宇宙搵料，原來剛榮獲香港米芝蓮指南評為一星級餐廳嘅滿福樓，推出咗全新「矜貴鮑魚菜譜」，大廚特別選用澳洲青邊鮑魚，構思幾道工夫菜，包括三鮮鮑魚冷拼、砂鍋鮑魚排翅、原隻鮮鮑扣豬刺筋，今次認真有口福lu！
查詢：2802 8888
家務貼士：自家洗羽絨
近嚟天氣反反覆覆，成日要着羽絨，好多人以為羽絨一定要乾洗，其實自己洗都好方便，先將羽絨浸响加入咗洗衣液嘅溫水中，然後用手按壓，衫領同袖口特別污糟嘅地方，可以用滲滿洗衣液嘅海綿輕力拍打；跟住將羽絨放入洗衣機甩乾一分鐘，再浸入溫水中按壓，然後換水再按壓多一次，拍鬆一下羽絨後陰乾就搞掂！
賀年仿真黏土作品，Kawaii！
叻太起底
年齡：30以上40未滿
職業：全職家庭主婦
家庭狀況：家有老公及4歲囝囝