08/01/2010

播放本新聞相關短片

叻太日誌

日本每逢過年,唔少品牌或商店都會推出福袋,畀顧客以超值價買入限定禮品,聽日有商場照辦煮碗呀!

以日本涉谷109為藍本嘅本地潮場銅鑼灣JFT及尖沙咀JF81,聽日會同日本涉谷109同步,分別推出109個正月限定福袋,各位姊妹聽朝記得去排隊!

福袋係日本人慶祝新年嘅傳統禮品,寓意「幸福の袋」,為新一年嘅來臨送上無限祝福。JFT推出嘅正月限定福袋,全部$2,000有找,裏面會有場內各個日系品牌潮物,總值高達$10,000,潮物包括Barak、DazzliN'、DELYLE、DURAS、EGOIST、JAGURA、GLAD NEWS等,而每個福袋內嘅產品都係由店舖精挑細選,保證獨一無二,當然最後買到咩,就要睇你運氣啦!此外,JFT當中16個日本109系品牌會加碼另推專屬福袋,售價同樣一律$1,999,每個品牌只會推出20個專屬福袋,絕對矜貴,產品總值亦高達$5,000,折扣有四折咁多o架!

查詢:2158 9524

殿堂級旅行用品專門店响銅鑼灣登陸,梗係要巡視吓啦!

旅行用品呢家嘢同知識一樣,都係用到時方恨少。英國經典旅行用品名牌DESIGN GO於1978年創立,近日登陸香港開設首間主題概念店,由以人體工程學設計嘅超級睡枕,以至坊間罕見嘅蚊叮蟲咬紓緩器均一應俱全,農曆年就快到,係時候入吓啲外遊用品啦!

查詢:2662 0928

囝囝最愛:泥膠煮飯仔

仲以為煮飯仔係女仔專利,點知囝囝睇完《美食風球》後話想學主角整漢堡包、雪糕畀我同老公食喎!好彩喺玩具店見到培樂多新出嘅漢堡大王及奇脆戲院小食店系列,用泥膠整出嚟嘅漢堡包、爆谷及薯條等等都好神似,最重要係所用材料及工具都好安全,放心畀囝囝「煮」餐飽啦!

查詢:2302 1221

溫馨提示:車主救流浪貓

叻太响Facebook加入咗一個關注流浪貓嘅群組,佢哋最近發出呼籲:「天氣轉冷,流浪貓為咗取暖會鑽入車輛引擎蓋或車底,萬一車主開動車輛,貓貓便會受傷或死亡,所以開車前,請打開或拍一拍引擎蓋,又或響Horn及望望車底有冇貓貓,以上動作只需幾秒,但可以救貓一命!」各位車主,可唔可以幫個手呀?