雖然用緊放濕機，但係囝囝仲係周身痕，要請教中醫師有乜止痕良方！
打電話問康和堂註冊中醫師任立新，佢話皮膚痕癢成因複雜，有可能係平日食得太多辛辣燥熱，又或濕熱油膩之物，再感受外邪所致，而精神緊張、情緒不安人士，易令內分泌失調，積鬱化火、化熱而動風，同樣亦可引致皮膚痕癢。
咁囝囝點算呢？任醫師話：「可以用白癬皮、苦參、地膚子、野菊花各三錢，煎水後沖洗身上痕癢處。」咦，叻婆婆成日話片糖沖涼可以滋潤皮膚，而近日亦有好多標榜具片糖成分嘅沖涼液，得唔得㗎？任醫師又話：「响中醫角度，片糖能益氣養血，健脾暖胃，驅風散寒，有活血化瘀之效，所以用片糖洗身的確有滋潤止痕癢之效。」民間智慧原來真係Work喎，哈！
查詢：2511 5591
搶呀！廚具大開倉，我又要着得Casual啲去大開殺戒啦！
師奶界嘅超級品牌Buffalo家品倉又開倉啦！今次開倉嘅廚具比往年更多，而且款式齊全，全部產品均以震撼價發售，好似低至半價嘅真空保溫套裝，尊貴嘅包裝禮盒等，買定新春送禮就最得體。如果你係超級邊爐友，今次亦有唔少特價萬用邊爐煲，而向來最受歡迎嘅意美廚易潔煎鍋系列由$38起，點呀，點買得咁多呀！
日期：即日至1月10日
地址：長沙灣道828號萬利中心（荔枝角港鐵站B2出口）
時間：11:00am至7:30pm
查詢：2959 1108
百變麵包口味
住响佐敦嘅阿May報料，話有一間新開麵包店啲麵包名好搞鬼，等我起吓佢底先，開咗幾間分店嘅「面包新語」，以口味健怡見稱，好似含豐富纖維、鈣及維他命嘅「無花果」，而芥末海苔法式麵包，以日本芥末及紫菜配上香軟法包，啖啖都咁濃味。
查詢：2156 9220
1哥1姐有着數
「老公，發達啦，你身份證有個1字，Yeah！」點解我咁興奮？因為荷里活廣場於1月份推出連串以「1哥1姐」為主題嘅活動，凡香港身份證號碼有1字嘅顧客（包括括弧號碼），只需出示有效身份證明文件正本，便可响指定店舖免費獲贈禮品（如護膚品試用裝）、低至一折購物優惠、消費現金券等，就算我哋只揸車唔消費，都有三小時免費泊車呀！
查詢：2118 8811
拍拖睇黑澤明
老公同我都係電影發燒友，以前拍拖會睇好多大師級嘅電影，而佢就最鍾意黑澤明。為紀念黑澤明誕生一百周年，最近有個「黑澤明個人珍藏品及照片展覽」，响指定日期放映多齣電影，還有逾250件黑澤明個人珍藏品，如電影戲服及道具、電影劇本和海報、相片、電影界授予的各種獎座等，以及由和田惠美設計、價值$700,000之和服；今個周末就同老公去重溫舊夢先！
「黑澤明個人珍藏品及照片展覽」
日期：即日至1月17日
時間：10:00am至8:00pm
地點：太古坊康和大廈Artis Tree
收費：免費
叻太起底
年齡：30以上40未滿
職業：全職家庭主婦
家庭狀況：家有老公及4歲囝囝