放大圖片

摩記一鋪翻身　Milestone撼贏iPhone

本文重點

全港最大芒Android機
語音搜尋搵SMS
影相定位齊升呢
機檔案

中文用辭多姿多采，小記爬格仔搵食當然明白；手機界嘅Android系統一樣唔輸蝕，只要有心開發，幾好玩嘅手機都有可能出現。好似沉寂咗一排嘅Motorola，踏入年尾竟然推出旗艦作Milestone，不但升呢使用Android 2.0系統，還坐擁12.7mm超薄機身、語音搜尋及符號指令等多個技術第一，堪稱摩記的翻身之作！

裝埋鍵盤，機身都只有13.7mm厚，側滑式手機最薄係佢。

提起Milestone，其實香港摩記一早放風會在年尾推出，但一直只聞樓梯響，等了又等還是水貨先行。Milestone原稱「Droid」，在北美上市時首星期便賣出十萬部，官方更估計第四季度總銷量可達一百萬部，仲好賣過機王iPhone，因此就算水貨入唔到中文，都要先買先享受！

全港最大芒Android機

家陣嘅Android手機，部部都係直立機身，靠篤芒喪入SMS，唔患板機指至奇！Milestone就還原基本步，跟HTC G1一樣玩側滑蓋QWERTY鍵盤設計，並把厚度激減至12.7mm，是歷年來最纖薄的側滑蓋型Smartphone。瘦身成功，屏幕面積卻反比例上升，達3.7吋WVGA級數，為目前全港最大芒嘅Android機款。最正是電容式面板唔只對應Multi-Touch，仲可以透過畫符號開啟不同指令，例如畫個「A」字就可進入飛航模式，醒過唔少智能手機。

雖然QWERTY按鍵只有指甲大小，但回彈力適中，幾好按！

可透過畫符開指令，唔使入Menu逐層揀咁麻煩，抵讚！

機面坐擁3.7吋巨芒，但下方仍保留主頁、選單、返回及搜尋等基本按鍵。$5,880

機面坐擁3.7吋巨芒，但下方仍保留主頁、選單、返回及搜尋等基本按鍵。$5,880

語音搜尋搵SMS

操作方面，雖然無用到自行開發嘅MotoBlur介面，但率先使用Android 2.0（代號Eclair）系統，在多方面都作出優化，例如瀏覽器支援HTML5語法，既可離線瀏覽，又可同時開啟多個網頁，用法更接近桌面瀏覽器。另外，今代Google Search終於可以搵埋SMS及MMS，甚至對應語音搜尋，用戶只要對住手機讀出Keyword，唔使幾秒系統便會找出相對應結果，真係連打字都慳番，但暫時只識聽英文，期望行貨推出時可以玩埋中文。

跟機送3.5mm入耳式耳筒，但低音麻麻，建議另配私人耳筒。

搜尋列旁多咗個「咪仔」圖示，按下後對着手機開聲，即可使用語音搜尋功能。

新瀏覽器可同時顯示十二幅書籤縮圖，唔似得舊版要掃幾版先睇得晒。

影相定位齊升呢

Android手機影相一向麻麻，Milestone為此追加了五百萬像素鏡頭及閃光燈，清晰度及補光效果，基本上已有所改善。而在新系統幫助下，操作介面亦大變身，支援半按快門外，還有齊微距拍攝、場景模式、白平衡調校及數碼變焦等，加上可拍D1規格短片，配套為同級最強。另一方面，GPS定位功能亦改善了，用Google地圖五秒左右便能得到初步定位，若帶到外國使用，只要該國提供Google StreetView導航功能，定位時便可以睇埋立體街景，連自駕遊一族都照顧到。

提供五百萬像素鏡頭及雙LED閃燈，配套為Android機最強。	影相介面專業咗，有齊閃燈、場景及白平衡調校，比Android 1.6版時豐富。	支援32GB microSDHC卡，但要拆蓋拆電先換到，唔夠方便。
內置的YouTube程式功能亦進化了，唔單止可以睇片，仲可以即拍即上傳，手機中唔係好多部做得到。