月初湖北咸寧有過萬名學生被市政府強烈邀請,冒着寒風浸溫泉齊創健力士世界紀錄,結果多番被傳媒狠批。細探之下,原來不少健力士紀錄都十分騎呢,早前香港亦有超過六千人一齊吹口琴破紀錄,真係諗得出就可以。
由二○○五年開始,每年十一月都會定出一日為「健力士世界紀錄日」(Guinness World Records Day,簡稱GWR Day),好似今年第五屆就定於十一月十二日,所以全球唔少地區都大搞活動響應,希望能夠再破紀錄。
過萬人騰騰震浸溫泉
地點:中國/時間:十一月
有「中國溫泉之鄉」美譽的湖北咸寧市,最近就舉行咗個萬人浸溫泉活動,有超過一萬名學生齊齊走到戶外浸溫泉,並在溫泉內排列出「10000」字樣,成功創出世界紀錄,不過當日氣溫只得攝氏十度左右,見佢哋只係着住件泳衣,真係諗起都打冷震。
最大型比堅尼巡遊
地點:南非/時間:十一月
所謂「最大」並非指身材,而係指參與嘅人數。南非約翰內斯堡早前就有二百八十七位比堅尼女郎參與大型巡遊,多過五月時美國所創下二百八十一人嘅紀錄。
吹口琴時間贏德國
地點:香港/時間:十一月
香港管弦樂團早前在跑馬地馬場搞咗個大型露天音樂會,吸引了近二萬人參加,會上更請來英皇五重奏和港樂成員帶領逾六千人一起吹口琴七分幾鐘,比起由德國做出的舊紀錄長了兩分幾鐘。而網上三千張門票更在十分鐘內被人掃晒,唔知又係咪另一項紀錄呢?
一指神功開椰青
地點:馬來西亞/時間:六月
用刀仔開椰青各位就見得多,但係何英輝師傅就改以一指神功,仲喺三十秒內插開四個椰青,快過街邊檔小販。但睇見何師傅開椰青開到面容扭曲,手指又變晒形,奉勸各位都係唔好打呢項紀錄嘅主意。
不停唱K七十六時
地點:韓國/時間:二月
唱K唱兩、三個鐘已經唱到聲都拆,但韓國家庭主婦金申玉就連續唱足七十六小時,計落即係唱咗超過三日三夜,歌神都唔夠佢玩!照計金女士嘅歌聲應該都唔錯,否則幫佢計時嗰位都幾受罪。
點樣申請健力士世界紀錄
已經度定好橋,諗住打破或自創健力士世界紀錄嘅朋友,可以去官網下載表格,標明各種證據同破紀錄嘅用意,然後寄番去等確認,通常四至六個星期就有回覆,你諗到未呢?