救生員多數都係大大隻隻、淨係睇樣都有晒安全感，咁又啱嘅，試問搵個「瘦蜢蜢」嘅人嚟救你，你都信唔過啦！好似澳門賽車，就連續四屆都由富士（Subaru）擔任賽道上嘅「救生員」，今屆繼續由Impreza WRX STI及Legacy 2.0GT分別擔任安全車（Safety Car）及救援車（Rescue Car），唔只個樣見得人，性能更加靠得住，為超過二百四十位車手隨時候命。
但凡高規格賽事，安全車及救援車都係必不可少嘅骨幹成員，前者領航，後者急救，身負重任。而多數賽事喺接收咗呢兩款車後，為安全計唔會畀任何人走近，好彩今屆大會體恤大家嘅好奇心，所以預先安排傳媒到澳門，親身了解呢兩部安全車及四部拯救車嘅來龍去脈。
開路熱身 Impreza WRX STI
採訪當日，除咗Impreza WRX STI及Legacy 2.0GT Wagon，香港嘅Motor Image工程師都去到澳門，親自監督裝嵌工程。先講領航用嘅Impreza WRX STI，2.5公升水平對向Turbo引擎有成300ps馬力及41.5kgm扭力，開路當然冇難度，而且為賽事需要，制動、輪胎及懸掛都經過嚴格檢查，最重要係裝埋訊號燈，包括車頂嘅黃色閃燈橋、頭燈由長開改為頻閃，車內仲有滅火筒以備不時之需，無論帶電單車、房跑車或方程式賽車熱身埋位都一樣掂。
救急先鋒 Legacy 2.0GT Wagon
至於有成260ps馬力嘅Legacy 2.0 GT Wagon，唔只夠速度趕去賽道上各個位置，特大嘅尾箱夠晒位放置各項救援工具，採訪當日就放咗四個泡劑滅火筒、氣壓式大力鉗及手提剪鉗等大型裝備，咁齊料，拯救效率當然高。另一方面，為咗方便大會識別、管理，Legacy 2.0 GT Wagon同Impreza WRX STI都裝咗黃色閃燈橋。無論安全車或拯救車，今屆大會都做足準備「揀啱車」，不過當然希望賽事全程順順利利，唔使用到佢哋救駕啦！
