提起喪屍Game，很多人會諗起《Biohazard》，不過多年來都係單人匹馬射喪屍打得多都悶，所以上年彈出隻《Left 4 Dead》，改玩四人合作，旋即全球大賣三百萬套。今日終於等到第二集開賣，除咗多近廿種新武器和角色版圖，連Online模式都變態咗好多，有得扮完人類再扮喪屍咬人，隨時玩上癮。

前排哈囉喂班喪屍可能勁得滯，搞到《Left 4 Dead 2》入面死剩四條友，以為同心協力就可以逃出生天，點知新增極變態嘅「生存」模式，有過萬隻喪屍同大佬由四方八面湧來，真係按掣都按到手軟，好彩可Call齊朋友人屍大戰，互相諗計消滅對手。

今集多了很多小Boss，各自擁有不同絕招如噴毒液、伸脷咬人，硬碰肯定冇得打。	生存模式開始前，先裝好炸彈和補給裝備，事關一開始喪屍便會從四方八面湧過來。	玩家除了可拎手槍，仲多了近身武器如斧頭、電鋸、煎鍋和球棍等，埋身肉搏必備。

生存模式按到手軟

齋睇《Left 4 Dead》個名都估到，遊戲是四條友合作打喪屍過關，由於敵人會失驚無神嚇鬼你，又或者隨時撲隻Boss出來，所以出發前一定要夾好邊個拎機槍裝炸彈，邊個從後補給救命。為了加強合作性和戰術運用，今集仲加入「生存」模式玩法，讓玩家守在補給站，對付四周湧埋來的屍海，炸完一堆卒仔又有幾隻Boss級怪物殺到，玩家要鬥捱得耐，簡直係挑戰人類按掣速度極限。

單機版AI變得更醒目，你拎斧頭上前衝殺時，隊員便會自動揀做機槍手、救護兵互相協調。	連線玩的清道夫模式和對抗模式，均可揀做喪屍向人類進行反擊，鬥快將人類玩家殲滅。	上網同朋友一齊玩，就算被建築物阻隔都可見到隊友嘅身影，唔怕被怪物食咗都無人救。

新武器玩埋身肉搏

好彩今集除了玩法和敵人變態咗之外，玩家嘅道具亦全面升級，當中加入超過二十種武器包括斧頭、電鋸、煎鍋、球棍等，萬一射到無子彈或被喪屍圍毆時，都可換近身武器肉搏，小記就試過拎斧頭和電鋸一下劈低幾件喪屍，威力仲勁過手槍。而玩家只要按十字掣便可選擇炸彈和應急道具，好似藥包、起搏器、腎上腺素等都是保命必備佳品。玩玩吓先發覺遊戲是《Counter-Strike》團隊創作，唔怪之得動作咁流暢啦。

上網扮喪屍反擊

Online對戰已成為遊戲界趨勢，《Left 4 Dead 2》亦特別加入多種連線模式，滿足喜歡尋求刺激的玩家，好似寫實模式中主角死了便即刻Game Over，唔可以叫隊友救命，增加唔少難度；對抗模式則可以扮喪屍Boss，使出咬頭伸脷等招數，對人類進行大反擊；最過癮是清道夫模式，四打四扮演完人類再做喪屍咬人，邊隊最快殺死晒人類就能勝出，既要善用攻擊招數又要玩戰術防守，刺激程度攞滿分。

機檔案

遊戲平台： Xbox 360

發　行　商： EA

遊戲類型： 動作

遊戲人數： 1-2人（單機）

2-8人（連線）

推出日期： 11月17日

售　　價： $329

查詢：3166 6001