回想番當年《任天狗》有幾紅，就知道寵物育成遊戲大有可為，今次《EyePet》就集合咗PS2時代《EyeToy》同兩年前PS3《The Eye of Judgment》兩家嘅所長，但就唔再養貓貓狗狗，而係對住個鏡頭養靈猴，感覺夠Fresh，好啱各位美少女！

雖然話之前在東京遊戲展上，SONY已經刻意Show咗支新Motion Controller，但係呢款PS3體感遊戲《EyePet》都仲未用上，只係照舊對住個PlayStation Eye鏡頭做動作，不過就加入唔少得意玩法，遊戲趣味性即時提升。

《EyePet》要配搭PlayStation Eye鏡頭同一張印有小掌印的指令卡先玩得到。	每日Keep住同馬騮仔玩，就可開啟更多小遊戲。	想外形再特別啲，大家可以幫佢裝身，染金毛或者戴黑超都得。

體感沖涼餵食

由於《EyePet》係由SCEA開發，所以遊戲中嘅主角並唔係日本PlayStation Icon之一嘅「嗶啵猴」，而係一隻擁有Baby Face嘅馬騮仔，外形都好得意。除遊戲光碟外，《EyePet》仲附送埋一個PlayStation Eye鏡頭同一張指令卡。呢隻咁得意嘅馬騮仔都唔算太難打理，只要大家有愛心同耐性，間中餵吓佢食嘢，得閒同佢玩吓就足夠。想幫佢沖涼嘅話，可以先轉去沖涼模式，然後將附送嘅指令卡移去畫面上指定嘅位置，指令卡圖示便會變成水龍頭，之後大家就可以拎住水喉幫馬騮仔沖涼，見佢沖得咁「梳乎」，做主人嘅梗開心啦！

馬騮仔表情豐富兼且活潑好動，識得用趣怪動作討大家歡心。	想整架飛機畀馬騮仔坐？大家只要先在白紙上畫低飛機嘅不同部分（機身、機翼同螺旋槳），然後對準鏡頭框框輸入。	當馬騮仔收到各位輸入玩具的指令後，就會咬住支畫筆照畫一次，並將佢變成模型。

注意鏡頭擺位

雖然話玩法同其他育成遊戲差唔多，但係《EyePet》最特別之處係有好強嘅互動性，例如大家在鏡頭前摸隻馬騮仔，佢會即時感應到；將膠波滾向畫面，佢又會識得避開；失驚無神對住馬騮仔拍手，佢又會被嚇倒，十分搞笑。甚至乎可以在紙張上畫上飛機同汽車，然後對準畫面上的框框，將所畫嘅飛機同汽車輸入遊戲，馬騮仔收到訊息後就會咬住支畫筆照畫一次，完成後大家仲可以控制馬騮仔揸飛機同飛車，玩法相當有趣。不過各位都要注意一下鏡頭嘅擺位，首先，鏡頭要向下望，其次就係擺位要離地三十至五十厘米，所以最好就係坐在地上玩；如果屋企地方唔容許嘅話，其實開張枱玩都得，不過感覺就無咁Free。

大家仲可以駕駛住繪畫的模型玩Mini Game，例如飛上天執氣球攞分。

放大圖片

互動性強

寵物育成遊戲最重要係玩家同虛擬寵物之間要有交流，《EyePet》算係做得幾成功，馬騮仔又交到戲；而且真實環境養唔到，玩《EyePet》就可以滿足到大家嘅願望。唯一美中不足嘅係遊戲只得連鏡頭套裝，已有鏡頭嘅用家都冇得齌買Game。

機檔案

類型：其他

開發：SCEA

平台：PS3

售價：$438（連PlayStation Eye ）