開業不久、位於灣仔的「信得過」，打正旗號做「豬」賣店，餐牌有杏汁白肺湯、黃沙乳豬膶、豬生腸、豬心、豬腰仔等，數得出的豬雜幾乎都有得食，令豬迷大為驚喜，即使不嗜內臟，亦有鮮元貝雲吞、花膠鮮肉水餃、豬仔蝴蝶腩等選擇，花樣多多，更引來少年食神米高（林澄光）前來試食。

「豬」多菜式任揀

能夠搜羅豬的多個部位，店主Peter說：「我每日都會在本地買新鮮乳豬，所以豬食品最多最齊。呢度每日要用上約十五個豬肺、三十斤黃沙膶。」精挑乳豬入饌，全因豬隻很嫩未受污染，可以放心食用，他解釋：「黃沙膶是指未受污染、顏色呈淺黃色的豬肝，入口特別爽甜。至於豬生腸更加矜貴，每一百隻乳豬只有約十隻，還要未生過的雌性小豬才有。」店方強調不用味精，Peter亦說所有豬雜除徹底清洗外，加上白灼方法才令食材的原味、鮮味得以保存。

愛地道灼豬雜

外號「牛魔王」的少年食神米高，今天來到這「豬」賣店，也要轉轉頻道，改試豬肉、豬雜。米高笑說：「其實我都鍾意食豬肉嘅，仲不時食豬雜添。」說起他的世界「豬」遊記，便滔滔不絕大談在吉隆坡邂逅的世界第一叉燒、馬來西亞的肉骨茶、上海的圓蹄、日本的炸豬扒等，但回到香港，米高便鍾情盅頭排骨飯、豬骨煲以及打邊爐的豬雜。原來少年食神最愛食豬腰、豬膶，說來頭頭是道，絕非浪得虛名：「喜歡腰膶的爽脆口感，記得連埋薑葱、辣椒豉油一齊食，特別惹味。」

白灼豬生腸 $60 據店主Peter說極其罕有，豬生腸啖落質感柔軟，亦沒有豬雜的臊味，白灼最能保留鮮味原味。	杏汁白肺湯 $38 店子首選推介，以鮮杏仁磨碎再打成汁，加白肺煲足三小時而成。乳豬肺軟綿綿，有淡淡杏汁香，湯頭不濃稠，易入口。	豬仔蝴蝶腩　$55 一如牛的坑腩般，是連接豬肺及豬腩部位的肉，每隻只一塊，肉質鬆軟無渣，筋膜爽脆。
鮮元貝雲吞湯　$30 雲吞以鮮元貝及鮮肉做餡，湯底則是火朣老雞濃湯，真材實料熬足幾小時而成。套用少年食神的評語：食得舒服。

飲食界金句王

語畢，米高即試食小店拿手菜，還選出最愛食物：「鮮元貝雲吞好有驚喜，味道好細緻，豬肉同元貝味道幾夾，金魚尾造型有心思。另外，我鍾意黃沙乳豬膶，質感爽又滑，鮮味都有，如果豬味濃啲會更突出。」平日金句多多的米高，曾講過「如果食了一樣致肥的食物，我會食一樣抵肥的食物，不要浪費Quota」、「食嘢是享受，而不是忍受」。今餐一次過食了如此多豬，又會如何善後？他笑笑口說：「哈，我會食番多啲蔬菜，均衡飲食啦，之後咪再食下一餐囉。」