唔少車主都鍾意換開坑迫力碟，可以加快散熱，以及去除迫力粉，其實咁做有利又有弊。當你飆車、跑山路嘅時候，制動系統因為頻繁使用而導致過熱失效，開坑迫力碟嘅作用，就係導入冷空氣，減低系統嘅工作溫度。不過日常駕駛唔需要長期煞車，根本就唔使加快散熱，開坑迫力碟仲會因為迫力皮與迫力碟嘅接觸面減少，令到制動力減弱。所以換碟前，諗清楚閣下嘅實際需要先。