買家庭影院組合究竟應該揀5.1、7.1定9.1聲道組合好呢？除咗要睇預算外，最緊要係屋企夠大夠位擺。Sony剛公布會推出一套全新的Blu-ray家庭影院系統BDV-E800，既可以用5.1聲道喇叭模擬到7.1聲道，日後仲能夠加多一對無線後置喇叭變成真7.1聲道，分段Upgrade都得。

今時今日買家庭影院組合當然要買Blu-ray，因為無人會咁笨用套靚聲喇叭睇DVD，所以Sony BDV-E800套件本身就包括一個Blu-ray機、兩支以Tallboy設計的前置喇叭、兩支後置喇叭、中置喇叭、低音喇叭以及S-AIR組件，總輸出達到1,000W。

想升級到真7.1？多買一套三件的WAHT-SBP1套裝就得。（售價：$1,280）	內置HDMI v1.3外，亦設有DM Port端子，可另接DM Port對應iPod或其他MP3機。	Blu-ray機規格齊全，影像輸出表現理想。

顯示色域更廣闊

套裝內的Blu-ray機已有齊現時主流的規格，對應到Dolby TrueHD、DTS-HD High Resolution Audio等音效解碼，配備BD-Live（需另加USB手指）可上網下載額外內容以及支援DVD影碟倍線功能等。影像輸出方面亦好有水準，採用色域更闊的x.v.Colour技術以及24p True Cinema技術，以高階BRAVIA電視實試，畫面固然冇得彈，電影感一流。

以Plug and Play方式就可加裝S-AIR，夠晒方便。

音效測試試播《The International》（《黑金殺機》）中間一段在古根漢美術館中的駁火片段，子彈橫飛效果甚佳，連打爆玻璃的聲音都夠清脆，夠晒刺激。

零干擾無線傳送

Sony這套BDV-E800家庭影院採用不少獨家音響技術，好似有出晒名的S-Master全數碼放大器，確保音訊原汁原味；在無線接駁上，更用上無干擾的S-AIR技術，兩隻後置喇叭唔需要駁線都輸出到極佳音色，而且安裝上只需Plug and Play，接駁夠晒簡單。音效處理方面由內置的32-bit數碼訊號處理器負責，可以做埋自動音場調校功能，輕輕鬆鬆就設定到皇帝位。

另外，喇叭設計上都作出改動，今趟高音單元的振膜比以往造得更貼服，令高音表現更強，同時只要使用5.1聲道喇叭就可以模擬出7.1聲道的表現，慳位之餘亦聽得出比原本5.1聲道有更強的環繞聲效果的表現。如果有錢有地方，更可以另購多一套無線環繞後置喇叭套裝WAHT-SBP1，$1,280包兩支喇叭加S-AIR接收器，非常簡單就可升級到真7.1效果。

BDV-E800規格

音效解碼格式：Dolby TrueHD、DTS-HD High Resolution Audio、DTS-HD Master Audio等

數碼訊號處理器：32-bit

輸出端子：HDMI、色差、Composite

總　輸　出：1,000W

聲　　道：5.1、7.1

售　　價：待定（預計九月推出）

查　　詢：2345 2966

升級靈活夠彈性

今次BDV-E800的設計相當之有彈性，若然覺得由5.1模擬7.1聲道未夠喉的話，仲可以隨時升級做真7.1聲道，加上後置喇叭全屬無線設計，擺位同樣靈活。