上討論區問嘢或者搵人幫手，大家好多時都會好好口咁以台灣傳過嚟嘅「大大」，或者本地叫開嘅「巴打」等名稱稱呼其他網友，而最近又多咗個新叫法「Ching」，大家唔好畀個大楷C誤導咗，以為佢係英文字，其實呢個字應該讀做「C-Hing」，即係「師兄」咁解。至於另一個常見於一些結婚或親子討論區嘅稱呼「99」，大家又估唔估到係乜嘢意思呢？佢係用咗英文字「Nine」嘅諧音，亦即係「奶奶」，所以當見到有人留言話「今晚要同99食飯」時，就千祈唔好誤會佢係陪緊隻狗狗食飯！