話咁快就一歲生日嘅Volkswagen HK Centre，呢期大搞優惠，選購任何型號嘅私家車，都可享五年保用及二十四小時中港全天候支援服務，VWHK嘅售後服務總監黃振鋒仲打趣話，就算喺西藏拋錨，都有專人送番部車落香港，計劃仲包括埋免費送後備匙、派鎖匠、電池搭電，以至更換備用輪胎等服務，周到得緊要。筆者就趁機向VWHK董事總經理Till Scheer打探，金融海嘯對香港車市有幾大影響先？佢就好老實咁講，今年頭五個月嘅香港汽車總銷量，比去年同期下降44%，但VWHK就逆市上升10%，市場佔有率仲由去年嘅5.47%，大幅提升至今年頭五個月嘅8.27%，躋身香港最暢銷汽車品牌第五位。Scheer仲透露，VWHK即將喺港島區開設第二個服務中心，並會盡快引入Scirocco、Golf Ⅵ GTI及T5等車款，好車陸續有嚟！