回想二○○七年，MG渣古（MS-06J Zaku Ⅱ）推出Ver.2.0，「升Grade」程度令人「O晒嘴」，高達Fans自然期待更多嘅2.0版本推出，最熱門嘅接棒人就係老虎（MS-07B Gouf），事關老虎與渣古喺設計上最相近，人氣又高。點知人算不如天算，竟然畀格魯古（MS-14S Gelgoog）、高達（RX-78-2）及吉姆（RGM-79）相繼截胡，等足兩年，MG MS-07B Gouf Ver.2.0終於蒲頭喇！
毛縫少 組裝話咁易
相信大部分高達迷都同阿Ray（二○○三年香港電擊模型大賽專業組季軍，現為「高達模型展館及教室」館主）一樣，等老虎出2.0等到頸都長，上月尾有貨到港，阿Ray就用三日時間火速完成。據呢位模型達人表示，砌呢隻老虎，好自然會諗起渣古2.0，雖然骨架以至外殼嘅造型都有顯著出入，但係設計路線其實同出一轍，所以砌過渣古嘅玩家，砌老虎時都會好易上手。佢又表示，老虎2.0喺組裝上實在好易，要打磨嘅夾口少之又少，喉管亦都似足渣古，令「毛縫位」大幅減少。
實戰Feel 軍事化塗裝
組裝上做到咁高水準，換言之改動空間已經唔多，所以阿Ray就將注意力放喺上色方面。2.0系列嘅造型，統統回歸三十年前TV版，Detail位及線位少咗，賣相亦比較「鈍」，所以阿Ray就以軍事模型嘅塗裝手法處理老虎，令佢有番實戰Feel。除咗主色用啞色處理外，邊位、角位，以至一節節嘅喉管，都落足心機做乾掃、舊化，令成隻老虎有晒滄桑感。除此之外，背囊嘅噴氣口、電鞭、左手五指機炮口，以及盾牌內壁就用咗金屬色，以Metallic效果加強老虎嘅悍將形象。阿Ray嘅軍事塗裝手法咁掂，我就好期待今年秋季首度MG化嘅太空坦克（RX-75-4），淨係一對履帶都可以令人大開眼界啦，Ray哥，你到時咪偷懶呀！
網址：www.rayhobby.com
查詢：2771 2923