今年係「超合金」三十五周年，而「鐵甲萬能俠」（Mazinger Z）就係首位超合金化嘅角色，「咁啱」新版嘅萬能俠TV動畫《真鐵甲萬能俠 衝擊！Z編》又喺今年播，「超合金魂」再出鐵甲萬能俠，大條道理啦！如果咁諗就以為呢款新超合金只係循例之作，你就錯晒喇，老實講，呢部編號GX-45嘅新Look，係歷代超合金萬能俠之中最型、最靈活、最隆重嘅版本。

新關節 點郁都得

講到咁好，事關GX-45係全新開模鑄造，絕對唔係將以往四款超合金魂萬能俠改少少就算。身形不但比前四款更合乎比例，更重要係全身關節大躍進，包括股部、膝頭及足踝都追加隱藏式關節，提升活動角度，就連手肘屈多過九十度時，肘位嘅裝甲就會連動起嚟，加埋頸位擺動角度都改善埋，無論出鐵甲飛拳、高熱火燄，或者裝埋對翼飛天嘅甫士，都有氣勢、順眼咗好多。而且為隆重其事，初回限定版仲有手套及抹布送，呢兩樣嘢原本好尋常，不過你會唔會隨便喺街買到印咗官方「超合金」字樣嘅款式先？

頸位嘅擺動幅度都大咗唔少，擺飛行甫士就易得多。	想起飛腳？將臂部嘅隱藏關節拉出嚟，對腳當堂靈活咗。	大角度屈膝時，膝頭嘅隱藏關節（紅圈示）就會收起，唔似以前嘅超合金會頂住大髀。

細過指甲嘅朋友號，對翼都可以屈埋，玩家冇話可說啦。	隨盒嘅Display架可以撐起萬能俠擺飛天甫士，仲幾實淨喎。	唔止可以屈膝出拳，連擘一字馬都得，關節設計確實抵讚。

放大圖片	除咗一對正常版拳頭，仲有另一對可以按掣發射，不過你捨唔捨得咁玩先？	初回限定版先有「超合金」標誌嘅手套及抹布，要買趁早。

網址：www.danielco.com.hk