老闆炒你魷魚？女友飛起你？一家大細屈在三百呎細屋？統統都冇有怕，只要在《The Sims 3》開過一局新Game，希望自然返晒嚟。聽日先正式出街嘅《The Sims 3》，基本玩法同上集差唔多，但就多咗好多細緻同得意設計，隨時可花你兩、三個鐘頭去創造新人物，而且角色同電腦玩家（NPC）都識得一齊成長，感覺真實咗好多。連《The Sims》忠實Fans劉心悠（Annie）都大讚新一集勁好玩，仲畀足十分滿分！
遊戲值唔值滿分，就等大家玩過再自行判斷，不過《The Sims 3》確實在多方面都有改進，無論人物造型同性格特徵都做得相當仔細，仲可以設定埋人生目標，製作認真。
造型性格任配搭
遊戲中最花精神亦最好玩嘅新賣點係創造人物的多元性，今集將各項設定作了詳細分類，而且選擇多多，連身形都有十幾種任你揀，如果想做番個同真人一樣嘅Sims角色，絕對有可能。揀好造型後，用家即可從六十四種性格中，挑選五種組合成角色性格，即係話要在《The Sims 3》遊戲世界中搵到個樣貌同性格完全相同嘅人，真係一啲都唔易。
生兒育女家庭樂
以前大家可能會覺得《The Sims》遊戲漫無目的，玩玩吓都唔知為乜，但今次就唔同，除了會因應所挑選嘅性格而發展出五種長遠目標外，遊戲中更會不時彈出短期目標，達成的話又會加分，挑戰性同可玩性都提高了。另外，今集保留了生兒育女嘅任務，兒女會隨角色成長，連NPC都同樣會隨住時間而變老，感覺就好似老街坊一樣，好有親切感。遊戲中仲設有相機同攝錄機，可以將遊戲片段拍低放上官網同其他玩家分享，交流心得。
發展鄰里人鬼情
以往在《The Sims》中只可以睇到自己嘅生活，隔離鄰舍發生緊乜嘢事都未必知道，今集遊戲就賦予大家「天眼通」能力，可以睇埋鄰居嘅日常起居，好在《The Sims 3》並無兒童不宜嘅鏡頭，最多都係談吓情、鬧吓交之類。不過遊戲都加入了一些「另類」玩法，好似設有多種「死法」，可以「唔覺意」浸死、電死、燒死其他角色，不過今集要「殺人」的難度就提高咗；如果角色死後立有墓碑嘅話，佢嘅鬼魂仲會間唔中飄出嚟，大家更可以趁機會識番個「鬼仔鬼妹」，甚至發展人鬼情！
機檔案
類 型：模擬
開 發：Electronic Arts
平 台：PC
推出日期：六月二日
售 價：$300（普通版）$380（特別版）
查 詢：3166 6001
設計開放 思想保守
雖然遊戲設計愈來愈逼真，不過《The Sims 3》在表達「嘿咻」、「洗澡」時都太過隱晦，前者限制多多而且大被笠過頭就完事，後者又加上超大格仔，削弱真實性。如果下一代遊戲可以做到視乎玩家年齡，Unlock到某些隱藏畫面就更好。