考到牌唔代表駕駛技術高，就算日日揸車返工、放工，都唔等如你技術高超到可以落場。早前筆者有幸參與今年嘅Audi Driving Experience，體驗On-road及Off-road嘅專業指導外，仲可以近距離接觸Q5、TT Coupe、RS6 Avant，甚至喺香港難得一見嘅R8，真係大開眼界。
今年嘅Audi Driving Experience已經係第五屆，德國廠方專誠派出六位高級導師臨場指導，當日嘅安全駕駛訓練課程主要分為越野駕駛（Off-road Driving）、安全緊急轉彎（Fast Lane Changing），以及繞障技術（Slalom）連緊急煞車（Emergency Braking），事後仲有賽道繞圈駕駛（Lap Drive）作結，能夠喺正規賽車場高速繞場一周，盡興之餘又機會難逢呀！
課程一
越野駕駛 超班Q5一剔過
大家清一色駕駛Q5，喺賽車場中央特設嘅Off-road地段進行訓練；路面唔只爛，廠方仲特意用「街胎」，睇嚟佢哋對Q5嘅越野能力好有信心。老實講，筆者嘅越野經驗係「零」，起初都驚驚哋，不過開住ESP行車，大幅將困難度調低，尤其是下坡時，合迪揸Fit人葛創基先生提醒筆者試真Hill Decent（下坡控制系統），呢項新發明好醒目咁因應坡度自動調節車速，令筆者呢啲越野初哥都可以「一剔過」順利過關。
課程二
安全緊急轉彎 quattro大發功
喺賽道嘅「L」形路段進行，高級導師Harald Buthner喺起步前俾晒提示，包括車速唔可以太快、唔可以超越教練車、與前車至少保持二十米距離，以及時刻留意路面情況，之後大家駕駛RS6 Advant出發。雖然RS6有成580hp馬力，但操控上毫無難度，喺quttro四驅系統及Dynamic Ride Control電子懸掛發功之下，就算高速入彎、轉線，依然保持到車身平穩行駛，服從性很高，成Team人都清脆利落攻陷呢個手臂彎。
課程三
繞障技術連緊急煞車 任試R8
輪到沙林環節，即係繞過雪糕筒，Harald就講明係專登考驗大家嘅操控技術及控制油門技巧，稍有偏差就會出現尷尬場面。主辦單位安排多款辣車畀學員輪流試駕，包括R8、RS6 Avant及TT Coupe等。筆者以前都玩過沙林，不過表現真係麻麻，十個雪糕筒，起碼撞跌五、六件；今次膽粗粗揸R8，都只係起步初段有一個雪糕筒遭殃，但之後全程都好準確咁左穿右插，真係要多謝Harald成班導師教得好，同埋quttro嘅四驅功能超班所至。
賽道繞圈駕駛盡興走一圈
導師駕駛R8領航，各學員就與RS6 Avant拍檔，高速環繞賽道一周，呢個項目唔係鬥快，目的係將先前所學嘅安全駕駛技術，一次過發揮出嚟。坦白講，揸住580hp嘅RS6 Avant，想唔快都難，不過大家都好自律，高速之餘亦緊守崗位，冇人胡亂爬頭，齊齊炮製Happy Ending。
香港幾時有賽車場
咁多人參加Audi Driving Experience，除咗因為品牌嘅號召力及課程內容吸引之餘，我諗另一個主要原因，就係今時今日香港都冇一個正規賽車場所至。雖然咁多年嚟都有唔少聲音呼籲政府正視賽車活動，喺香港起番個賽車場，但係有關當局一直充耳不聞，搞到香港車迷好鬼谷氣。唔知筆者喺有生之年，會唔會見到Audi Driving Experience喺香港舉行呢？
葛Sir用心良苦
一連六日嘅Audi Driving Experience，招待咗三百位車主，受歡迎程度可見一斑。合迪汽車董事總經理葛創基表示，是次活動既可推廣「尊貴、動感、進取」的品牌哲學外，亦為駕駛者提升駕駛自信，減少發生意外嘅機會。所以Audi Driving Experience嘅舉辦目的，就係喺專業嘅場地，以及優良嘅師資及車款等配套下，令車主可以全面又有效率地提升個人駕駛水平，真係用心良苦呀！
雙S名模 車手上身
每逢大型活動，奧迪都會邀請明星助陣，今次都唔例外，既有張震、楊千嬅，仲有靚爆鏡嘅「雙S」名模—Lisa S及Amanda S，兩位靚女仲着埋火紅色Full Gear賽車手打扮，成為全場焦點。佢哋都話好鍾意奧迪車系，Lisa S話想買部A6畀男友，Amanda S就希望送部Q5畀爸爸做父親節禮物喎！