Cheaperman日日走勻全港搵「Cheap精選」介紹畀讀者，鞋都走爛幾對，所以佢決定買番架車嚟代步。佢聽人講，近日喺觀塘區竟然發現佢夢寐以求嘅Dream Car，除咗慳油之外，設計仲符合環保意念，Cheaperman當然第一時間要走去Look Look啦！
以前Cheaperman成日聽人講觀塘區有好多平靚正嘅食肆同貨品，之前佢就去過搵專賣日式手信嘅舖頭，不過就冇細心行，今次專程嚟搵車，沿途都畀佢搵到唔少正嘢。
第一站 高纖健康餐
觀塘區雖然食肆林立，但標榜健康嘅食肆就唔係咁多，向來注重飲食健康嘅Cheaperman，竟然喺一個商場裏面，發現一間以健康午餐作招徠嘅食肆。佢哋嘅健康午餐其實係一杯營養飲品，以高纖維同蛋白質豐富嘅食材，例如麥皮、胚芽等製作而成，飲一杯已經好有飽肚感。肚餓嘅Cheaperman，立即買咗一杯嚟試，廿蚊搞掂一餐，抵！
食完嘢閒逛，又畀佢見到一間三十蚊剪髮舖，雖然齋剪冇得洗，但一腳踢嘅老闆服務態度好好，雜誌、影碟任客睇，不過本身已經係Skinhead嘅Cheaperman就冇試到。
第二站 好人雪糕屋
為咗搵車，Cheaperman由觀塘行到落牛頭角，但天口咁㷫，真係好辛苦㗎。當佢經過一個大型商場時，竟然畀佢發現一間雪糕屋。店內雪糕勁平，十二蚊一個嘅大雪糕球，竟然有拳頭咁大！店員仲好好人，全店雪糕任試，畀客人試啱先至買，Cheaperman都唔客氣試咗好多款。店內除咗雪糕之外，仲有水果Pancake賣，都好好味㗎！
第三站 露餡零食店
搵咗幾日都未搵到心水Dream Car，Cheaperman決定要Call番Cheap星求救，終於畀佢知道原來架車喺九龍灣，於是即刻撲過去。沿途經過一間專賣零食嘅批發店，裏面有超多Cheaperman勁愛嘅朱古力。當佢好開心咁揀緊朱古力之際，就望到架上面有啲好得意嘅零食模型。原來係用嚟表示包裝內嘅食物係點樣嘅，咁就唔怕買錯啦！
第四站環保慳油車
掃完零食，Cheaperman終於去到指示講嘅九龍灣汽車陳列室，仲喺好人Sales姐姐嘅介紹下搵到佢架心水Dream Car。呢架豐田Prius 250，係Prius系列嘅第三代，喺外觀上，低風阻嘅流線型設計，令行車更暢順；採用1.8公升引擎，配上輸出81ps馬力及55.7kgm扭力嘅摩打，動力一觸即發。更全面採用進化版嘅Hybrid系統，令燃油消耗銳減，耗油量只係3.93L/100km，比上一代節省高達10%，而廢氣排放量亦大大減低，只有89g/km。
其他細位設計亦花咗好多心思，例如車頭燈外形突破傳統框架，線條恍如烈燄般令車頭更具氣勢；而水撥亦加入雨點感應裝置，落雨時水撥裝置會自動啟動，認真方便；再配合車廂內櫳嘅四幅式真皮軚盤連輕觸式按鈕，簡直就係Cheaperman嘅心水Dream Car。到底佢最後有冇買到呢部車？快啲Click入ontv生活台度睇吓啦！
網址：tv.on.cc