未講呢部Sony新高清DV機TG5之前，先出兩條問題考大家：「1mm到底有幾厚？10g又有幾重呢？」答案係1mm跟一條頭髮粗幼相差無幾，而10g就同個一蚊銀差唔多重。點解咁問？因為TG5就比去年推出嘅TG1薄上1mm，兼且又輕上10g，再次刷新DV界最細同最輕嘅紀錄。但細咗唔代表「偷工減料」，TG5仲加送多16GB內置記憶體同一笑即拍模式，計落都幾抵玩！
先對比一下去年推出嘅TG1同新機TG5嘅尺寸及重量，根據官方數字，原本TG1體積為32×119×63mm，淨重240g，而TG5尺寸則為30×117×62mm，淨重230g，即係話TG5再次打破原來由TG1所保持嘅「細」界紀錄。
雙色鈦金屬機面
話晒TG1都係去年業界最輕最細嘅DV，所以今次小記將TG5拎上手，雖然唔覺得兩者有明顯分別，但對於一部要成日單手揸住，走來走去拍片嘅攝錄機嚟講，始終都係愈輕細愈好。而今次部TG5嘅機款造型就較TG1出色，首先機面用上鈦金屬製造兼以雙色配搭，既可防刮花亦夠美觀，另外手感方面都做得唔錯，只係要用手指公捽變焦掣呢個操作方式有少少麻煩。
免插卡高清直錄
TG5另一新賣點係除咗對應MS Duo同MS PRO Duo記憶卡之外，今次更預先內置16GB記憶體畀大家拍片。雖然話現時記憶卡唔值錢，不過16GB都仲賣緊幾百蚊，就算唔記得帶卡或者打爆張記憶卡，單靠內置嘅16GB記憶體，都已經可以記錄到最多六個半鐘嘅高清片，如果買多張16GB MS卡更可將拍片時間倍增至十三個鐘，即使去一趟長途旅行都夠晒用；不過要留意嘅係電池容量有限，標準電池最多只可連拍一小時四十分鐘，去旅行時最好都係買多一粒後備電池穩陣啲。
另配廣角鏡更好玩
TG5亦全數保留咗TG1所有好玩又實用嘅功能，例如可在拍片途中㩒下Photo掣同步影相，另有每秒二百四十格高速拍攝模式，令到原本只有三秒嘅影片變成十二秒嘅流暢慢鏡攝錄，效果相當過癮。TG5除咗原有嘅臉部偵測功能外，亦新增咗Cyber-shot相機嘅一笑即拍模式，玩法更多。如果想玩多啲拍攝效果，仲可以另配一支新推出可直接套在TG5鏡頭前嘅0.7x廣角鏡VCL-HGE07TB，將原來最Wide只得43mm嘅鏡頭變成30mm，旅行時用來拍攝城堡或者建築物都更有氣勢，大大改善手提高清DV機鏡頭唔夠闊嘅缺點。
查詢：2345 2966