電動車做到零排放，而且消耗低，行車成本只需$0.1/km左右，照計應該大熱先啱，不過充電配套不足成為最大嘅絆腳石，唔通香港車迷與電動車真係無緣？以前就係，將來未必，因為中電同領匯，以及一間停車場管理公司已經簽署咗電動車充電系統合作備忘錄，計劃喺未來一年，於至少十個停車場安裝充電設施，並於未來五年擴展至屋苑停車場，大家終於可以做零排放車主喇！
其實唔少車廠都以零排放、低噪音為目標，開發電動車，好似MINI E、smart fortwo ed都進入最後測試階段，有望明年推出。香港人都唔失威，理大繼成功開發「My Car」後，日前再展示一部以smart fortwo改裝而成嘅電動車。係邊個咁叻？原來係香港理工大學電力電子研究中心主任鄭家偉教授，佢仲話改裝工程唔算複雜，將原本嘅電油引擎改為電動馬達外，其餘大部分結構都保留原來設定，轉向、制動，以至懸掛統統沿用，改裝費只係$30,000，鉛酸電池就佔咗三分一。性能方面仲唔輸蝕，極速70km/h，充滿電只需$10電費左右，續航力去到100km，行駛每公里，電費$0.1，如果用快速充電器，兩個鐘搞掂，「慢叉」就要八個鐘。
計劃八達通收費
車就有喇，充電配套點算先？環境局局長邱騰華表示，政府已經成立督導小組，專門研究電動車技術及供電設施，並計劃先喺政府大廈安裝充電器。唔少人仲以為電動車充電程序繁複，實情用電纜將電動車接駁至家用插頭就掂，連火牛都慳番。
有咗充電器，咁又點收費？中電就計劃用八達通及信用卡等模式收費，車主可以自行選擇充電時數，實際細節有待確定，至於首個充電器有望喺四個月內完成安裝。中電常務董事阮蘇少湄補充，充電器將覆蓋九龍、新界及大嶼山等十四區（唔包括港島），試驗計劃初期集中喺公眾停車場，再按實際需要逐步增加範圍，希望有關當局可以效率高啲啦！不過，現階段最大問題唔係電費高低，亦唔係有冇適合車款，而係防止破壞王或偷電賊，將人哋充緊電嘅電纜插落自己部車，唔知喺插頭加把鎖得唔得呢？