老變電影第二集《變形金剛：狂派再起》（簡稱「變2」）下月正式上映，聽聞今集博狂兩派將上海當戰場，又有合體的「建造派」喪轟柯柏文，仲有大量新角色，未上映、先興奮！孩之寶更加「煽風點火」，搶先推新玩具，仲約埋香港變形金剛聯盟（HK-TF）粉絲舉行試玩大會，最搶鏡自然是主角柯柏文與麥加登的神秘造型，兩派大佬一隻玩合體、一隻變坦克，仲引入連動閃燈系統，識得發聲、發光，夠晒Effect！
睇戲名，都估到今集講狂派大反擊，麥加登被打撈翻生不特止，仲唔變飛機變坦克，與一眾狂派大肆破壞，搞到柯柏文要同天火（SR-71偵察機）合體至夠打。雖然新Trailer和官網只係透露咗咁多，但有得玩住新玩具先，都算望梅止渴。
連動閃燈Feel So High
率先玩過新版柯柏文及麥加登等玩具，就算仲係變貨櫃車的柯柏文，變身方法、關節與身材都截然不同，雙手仲跟足電影加入火燄刀；麥加登更由空軍變陸軍，修復成獨臂坦克車登場，手腳可作360度轉動，並支援連動系統，只要郁動手部或心口，便會發出聲音和閃燈，咪話小朋友，大朋友Fans見到都好感動呀！
舊朋友新形象
上網睇Trailer，不難發現今集加入勁多新角色，連音波、破壞者等老朋友都返晒嚟。好似音波由卡通年代的錄音機，電影版變成間諜衞星，仲有隻機械狗幫拖；上集被麥加登劏開兩邊的爵士，由舊角色斯韋伯Corvette跑車取代；當然唔少得一出場就四處破壞的巨轆泥頭車Demolisher，同樣令人期待。
粉絲有Say
雖然「變2」試玩會只有部分角色曝光，隱藏的狂派祖先Fallen、六機合體的建造派Devastator未見影蹤，但有成幾十款由三吋到十五吋新玩具任玩，令HK-TF成員好興奮，先聽吓他們的意見。
會長Patrick
新版柯柏文同麥加登都比上集討好，仲加入連動閃燈系統。最意外係一眾變形金剛配件都好好玩，好似真人大黃蜂頭盔及手槍，已經夠過癮。
二十年資深粉絲Tony
我就睇中Leader版柯柏文，除咗變身系統及設計同上代完全唔同，仲可以同天火合體。雖然天火仲未見影，不過我已經當咗佢係入貨首選。
HK-TF會員優先試玩電影版玩具，仲話約埋去月底的首賣會和睇電影。
查詢：2302 1221（Hasbro HK）