就算唔係機迷，都冇理由未聽過《Dance Dance Revolution》呢款遊戲，亦即係大家叫慣嘅「跳舞機」。當年呢款連埋跳舞氈一齊玩嘅PS版遊戲真係Hit到爆，雖然咁多年嚟《DDR》都出過好多好多Remix版，但一直都係得啲英文歌同J-POP，依家等足十年，呢款Xbox 360版《Dance Dance Revolution Universe 3》（DDRU3）終於首次加入中文歌，國語連廣東歌加加埋都有成廿首，大家收埋十年嘅舞技又可以再次大派用場啦！
今次追加咗中文歌曲嘅《DDRU3》，不單止玩落更親切，更加入埋買戰衣同捽碟等街機都冇嘅元素，配合趣味性甚高嘅對戰模式，幾百蚊就可以响屋企日日跳，仲使乜參加啲一對一消脂運動。
廿首國語廣東歌
聽見Konami會出有中文歌嘅《DDR》已有一段長時間，原本安排在舊年年底推出，但估唔到一等就等到今年第二季先有得玩。好似《DDR》這類音樂遊戲，靈魂都係裏面收錄嘅歌曲，睇勻今次所收錄嘅廿首中文歌曲，雖然當中都有唔少大牌歌星，好似有Joey、Twins（無錯真係Twins！）、棒棒堂、蔡依林同蕭亞軒咁，但歌曲就唔係佢哋嘅主打熱播，而且全部都係兩、三年前嘅舊歌，真係唔知係因為遊戲遲咗出嘅關係，抑或係版權費用嘅問題，趕唔切Update啲新歌，不過如果大家係英皇群星嘅Fans，都應該玩得幾開心！雖然話係中文歌版本，但《DDRU3》都有收錄英文歌同J-POP，總數有成六十首，要跳晒咁多首歌都有排跳。
儲錢買閃爆戰衣
跳舞機玩法不外乎跟住熒幕上嘅箭嘴同節拍嚟跳，而且來來去去都係得上、下、左、右四個方向，玩法簡單得來又有啲單調，不過運動量都唔細，若果遇啱啲快歌都咪話唔跳到索氣，幾適合用嚟Keep Fit消脂。除咗配合跳舞氈喪跳外，今次Xbox360版遊戲亦加入咗一個用手掣玩嘅DJ模式，各位可以隨意揀首歌玩Remix，發揮捽碟才能；當然玩家亦可以取巧地以手掣取代跳舞氈，但筆者覺得咁就失去晒玩《DDRU3》嘅意義同樂趣。想要多啲挑戰性嘅話，可以揀選Quest故事模式逐級鍛練身手，跳贏對手就可賺錢買戰衣閃爆舞池，不過呢啲超Sexy舞衣都幾貴，有排跳先儲夠錢。
四人一氈同場比舞
相比起之前介紹過嘅單打玩法，筆者覺得《DDRU3》嘅對戰同多人模式特別得多。好似遊戲中設有Attack模式畀兩個玩家比試實力，連續跳啱節拍嘅玩家可以儲Combo，將對手畫面壓低，令佢更難睇到箭嘴指示；另外Bomb模式就可以玩拋炸彈，儲到Combo後將炸彈拋畀對方，如果對方唔能夠喺限時內還擊就會爆炸，相當過癮。如果約埋成班朋友上嚟開Party，咁一定唔可以錯過個Party模式，最多可以支援到四人同場比舞，但萬一唔夠四張跳舞氈又點算好？咁就只好改為四人同時Share一張跳舞氈輪住玩。
中文歌名單一拳公開
粵語歌
容祖兒 《貪嗔癡》
謝霆鋒 《曝光》、《第二世》（合唱版）
Twins 《布拉格之戀》、《錯在聰明》、
《你不是好情人》（合唱版）
關智斌 《Say Love Me》
吳浩康 《浮華亂世》
泳兒 《找自己》
國語歌
蔡依林 《玩美》
蕭亞軒、胡彥斌 《進行式》
胡彥斌 《皇帝》
張惠妹 《Big City》
花兒樂團 《化蝶飛》
蕭亞軒 《因為愛》
黃立行 《我是你的誰》、《世界只有我們》
棒棒堂 《夏日初體驗》
B.A.D. 《靠近妳》
容祖兒 《獨照》
機檔案
類 型： 音樂
開 發： Konami
平 台： Xbox 360
推出日期： 五月十三日
售 價： $528（連跳舞氈）
查 詢： 2246 8113